Garcia: I am not Superman!

CEBU, Philippines — Pipila ka mga motorista ang natanggong atol sa pagbunok sa ulan human adunay mga pagbaha-baha sa pipila ka mga dapit sa dakbayan sa Sugbo ug Mandaue. Sama nalang sa Salinas Drive Baranagy Lahug nga nahisama nga sapa ang karsada. Kusog usab ang sulog sa tubig hinungdan ang mga tawo mipadaplin ug wala na mosungasong sa baha.

Samtang sa usa ka karsada usab nga napataliwad-an sa dakong mall ug unibersidad sa Barangay Banilad sa dakbayan sa Sugbo lawom usab ang baha ug lisod maagian sa mga sakyanan.

Sa Dakbayan sa Mandaue mosaka ang tubig kun kusog ang uwan ug dili maagian og lahus ang dalan A.S. Fortuna tungod sa mga lawom nga tubig sama sa atubangang bahin sa Rolling Hills ug L.H. Prime sa Barangay Banilad  samtang sa Cabancalan ang  M.L. Quezon duol sa barangay hall  ug sa may gasolinahan diha sa Barangay Tipolo.

Lisod sab maagian sa gagmay nga sakyanan ang utlanan sa Barangay Subangdaku sa Mandaue City ug Mabolo sa Cebu City.

"Two and half months pa ‘tawon ko uy, I am not superman, kung pwede pa lang nato i-blow ang tanan, pero kabalo ka unsay importante atong short-term, as well as medium term, and long-term goals," matud pang acting Mayor Raymond Alvin Garcia sa mga tigbalita sa usa ka pakighinabi kagahapon (Biyernes), Agosto 2, 2024.

Si Garcia nilingkod isip acting mayor niadtong Mayo 9, 2024, human sa preventive suspension nga gipahamtang batok kang Cebu City Mayor Michael Rama.

Dugang pa ni Garcia nga adunay gihimo para masolusyonan ang baha sama sa pag-declogging ug pag-desilting pinaagi sa mga mechanized ug manual nga sistema ubos sa mga short-term plans. Di palang dugay gisuwayan ang usa ka mechanized desilting machine kansang budget appropriation anaa sa P100 milyones, gamiton kini aron habwaon ang mga basura ug lapok sa mga agianan sa tubig sa siyudad.

Lakip sa medium-to long-term nga mga plano ang paghimo og mga mini dams ug gabion dams sa kabukiran sa siyudad aron dili tanang tubig gikan didto mohan-ok sa ubos.

Gihimug-atan ni Garcia nga duna silay mga weekly meetings apil na ang Task Force Gubat sa Baha, Department of Work and Highways (DPWH) aron masiguro nga matuman gyud ang mga plano. —Iris Hazel Mascardo/IBM BANAT NEWS