Rightsizing sa Cebu City Hall gipahunong, kay mo-hire og 2,000

CEBU, Philippines — Gihunong una sa kagamhanan sa Dakbayan sa Sugbo ang gipaimplementar ni suspended Cebu City Mayor Michael Rama nga rightsizing programa sa mga kawani sa siyudad.

Kini tungod kay ang kagamhanan sa siyudad anaa karon sa proseso sa pagpuno sa 2,000 ka plantilla positions nga nabakante.

Kagahapon si Acting Cebu City Mayor Raymond Alvin Garcia nibutyag sa mga tigbalita nga ilang giuna ang pag-hire og plantilla positions sa city hall.

“You know the sad reality of this is that sometimes gud magsige ta og ilis-ilis og administration every after three years, of course ang mga empleyado sa miaging administration inig abot sa bag-o, papha gyud na tanan, mao ang uban dili gusto nga magbutang uog permanenteng empleyado", matud ni Garcia.

Sa pagkakaron, si Garcia nihatag og direktiba sa selection board sa siyudad nga paspasan ang pag-hire sa mga regular nga empleyado.

Kini human usab gi-flagged down sa Commission on Audit (COA) ang nahabiling bakante nga 2,311 ka plantilla positions ug nikabat sa P2.192 bilyones ang wala magamit nga pundo alang niini.

Sa samang taho, niadtong Disyembre 31, 2023 ang siyudad nakaaproba sa kinatibuk-ang 3,645 ka plantilla positions apan 1,334 lang o 36.6 porsyento ang napuno. Sa iyang bahin, si Garcia nagkanayon nga giingnan usab sila sa Civil Service Commission nga kinahanglang mo-hire ang gobiyerno og plantilla positions ug dili na mag- hire og mga temporaryo nga mga pwesto ilabi na job orders (JO). (BDB)  BANAT NEWS