Kaso sa rabies sa Dakbayan sa Sugbo nisaka–DVMF

CEBU, Philippines — Nisaka ang kaso sa rabies sa iro sa Dakbayan sa Sugbo kini base sa datos nga gipagawas sa Department of Veterinary Medicine and Fisheries (DVMF) diin adunay natala nga 19 ka kaso sukad sa buwan sa Enero hangtud sa Hunyo niining tuiga diin mas taas kini og pito ka kaso kompara sa tibuok tuig 2023.

Gihulagway ni Dr. Alice Utlang, city veterinarian nga gipakusgan nila karon ang pagpamakuna sa mga iro sa kabarangayan diin target nila nga moabot sa 80 persyento.

Apil sa gitinguha nga hingpit nga mapatuman ang pagpangrehistro sa mga mananap nga binuhi sa mga residente sa siyudad kini aron mailhan ang tag-iya nga maoy manubag sa mga panghitabo nga naglambigit sa mga iro, iring ug uban pa nga mga hayop.

Matud ni Utlang nga aron dili mosanay ang mg iring ug iro nga mga latagaw padayon ang pagpangapon ug ligit sa mga hayop.

Gibuksan na usab sa DVMF ang ilang animal clinic nga mo cater sa mga iro nga nagproblema sa ilang panglawas gitumong kini aron malikayan ang giingong paggamit sa mga hayop isip fund raising kon adunay mga problema sa panglawas ug minimal lang ang mabayran sa mga pet owner sa DWMF Animal Clinic itandi sa mga private clinic. (BANAT NEWS)