Plantasyon sa marijuana gironda

CEBU, Philippines — Mokabat sa  P1.2 milyon balor sa mga punoan sa tinanom nga marijuana ang gipanglarot ug gidauban sa mga sakop sa Special Operations Unit 7 PNP Drug Enforcement Group sa bukirang bahin sa  Barangay Bayong sa Lungsod sa Balamban ala-una sa hapon kagahapon adlaw nga Martes, Hulyo 30,2024.

Matud pa sa otoridad nakadawat sila og impormasyon kabahin sa marijuana plantation nga gitanom sa bukirang bahin sa nahisgutang lugar maong ilaha kining gironda.

Walay naabtan nga tawo ang mga  polis sa lugar apan bisan pa man niini, gipadayon nila ang paglarot ug pagsunod niini.

Giingon 1000 square meters  ang luna nga gitamnan sa mariquana. Moabot sa 6,000 ka  fully- grown marijuana ang gipanglarot.

Nagpahigayon na og imbestigasyon aron mailhan kun kinsa ang nagtanom niini lakip na pagsusi kun kinsa ang tagiya sa maong luna.—  IBM BANAT NEWS