Sobra P6M drugas nasakmit atol sa buy-bust sa kapolisan

CEBU, Philippines — Nasikop sa gipahigayon nga buy-bust operation sa Regional Police Drug Enforcement Unit (RPDEU)-7 ang tig-deliver og shabu diha sa Barangay Labangon, Siyudad sa Sugbo niadtong Martes sa gabii.

Ang suspetsado mao si Xaviery Tagolino Comedia alyas "Omni", 31-anyos ulitawo residente sa Purok 1 Andres Bonifacio, Sitio Marpa, Barangay Pulpogan, Lungsod sa Consolation.

Atol sa anti-drug operation nakuha sa posisyon ni Comedia ang 250 gramong shabu nga nibalor ngadto sa P1.7 milyon.

Sa laing bahin, nikabat ngadto sa P4.8 milyos ang balor sa ilegal nga drugas ang nasakmit sa Philippine Drug Enforcement Agency (PDEA)-7 atol sa ilang buy-bust operation didto sa Negros Oriental, Bohol ug Dakbayan sa Mandaue niadtong Hulyo 16, 2024 diin lima ka indibidwal ang nadakpan.

Ang PDEA Negros Oriental Provincial Office uban ang Negros Oriental Police Provincial Office ug PNP Regional Intelligence Unit nihimo og buy-bust operation ngadto sa Purok 4, Boloc-boloc, Sibulan, Negros Oriental diin napuhag nila ang usa ka drug den ug tulo ka tawo ang nasikop.

Nadakpan sa operasyon ang subject ug tigmentinar sa drug den nga si Jhon Renz Duran, 23-anyos, walay trabaho ug ang duha ka tigbisitahan sa drug den nga sila si Lucito Lañojan, 45-anyos, telecom cable installer ug Mateo Pascual, 42-anyos, walay trabaho. 

Nakmit gikan sa mga suspetsado ang walo ka putos nga shabu nga nitimbang ngadto sa 6 gramos ug nikabat ngadto sa P40,800 ug buy-bust money.

Ang PDEA Bohol Provincial Office uban amg Bohol Police Provincial Office Drug Enforcement Unit, Bohol Maritime Police ug Tagbilaran City Police Station nakasikop og suspetsadong high value target atol sa ilang buy-bust operation ngadto sa Purok 4, Mansasa, Tagbilaran City, Probinsiya sa Bohol.

Ang suspetsado mao si Macrino Clarete IV, 33, construction worker, taga Tagbilaran City. Nasakmit gikan sa suspetsado ang siyam ka putos sa ilegal nga drugas nga nitimbang og 205 grams ug nibalor ngadto sa P1.3 milyon.

Samtang sa Sitio Bangan, Cabancalan, Mandaue City, ang PDEA-7 uban sa Naval Forces Central, Mandaue City Police Office Intelligence Unit, Drug Enforcement ug MCPO Station 4 nakadakop og laing HVT.

Ang suspetsado mao si Rex Navasca, 20-anyos, baker, taga Lungsod sa Barili.

Nasakmitan gikan sa suspetsado ang duha ka putos nga shabu nga nitambang og 500 gramos ug nikantidad tanan ngadto sa P3.4 milyones, buy-bust money, motorsiklo ug ubang non-drug evidence. (BANAT NEWS)