Mga delegado sa Palarong Pambansa namauli na

CEBU, Philippines — Hinay-hinay na nga nanguli sa ilang mga lugar ang mga delegado sa Palarong Pambansa 2024 human natapos niadtong Martes, Hulyo 16, 2024 ang maong dakong kompetisyon sa paugnat sa kusog. 

Kagahapon ang delegado sa Region 3 o Central Luzon nibiyahe na kini kagahapon pauli ngadto sa ilang lugar.

Apan pabilin nga full alert status ang Cebu City Police Office (CCPO) tungod kay ang ubang mga delegado nagpabilin pa sa mga billeting areas tungod kay karong adlawa pa manglarga.

Matud ni Police Lieutenant Colonel Janette Rafter, deputy city director for administration sa Cebu City Police Office nga karong adlawa i-pullout ang billeting security apan gipasalig sa CCPO nga bantayan gihapon ang seguridad sa ubang delegado nga nagpabilin sa Sugbo tungod kay nibisita pa sila sa tourist spots.

Nagpasalamat ang CCPO sa nagkalain-laing city ug provincial offices ingon man sa RMFB -7 sa suporta nga ilang gihatag alang sa malinawon ug malampuson nga Palarong Pambansa 2024.

Pasalig sa CCPO ngadto kanila nga andam usab sila nga mosuporta kon sila na usab ang magkinahanglan. (BANAT NEWS)