Food stamp program sa DSWD gipaniguro nga magmalamposon

CEBU, Philippines — Pormal na nga nakigtambayayong sa mga lokal nga retailer ang Department of Social Welfare and Development (DSWD) Field Office-7 (Central Visayas), pinaagi sa pagpirma sa Memorandum of Agreement (MOA), alang sa pagpatuman sa Walang Gutom 2027: Food Stamp Program (FSP) sa rehiyon.

Gidayeg ni DSWD Asst. Secretary ug Spokesperson Irene Dumlao ang Field Office-7 tungod niining bag-ong kalambuan, nga magsiguro sa rehiyonal nga kalamposan sa programa.

Matud niya nga pinaagi niini ang DSWD nagsiguro sa mga lokal nga retailer sa pagpatuman sa FSP, nga nagkonekta kanila ngadto sa natukod nga mga merkado sama sa mga benepisyaryo sa FSP.

Kini nga pamaagi nagsuporta sa mga benepisyaryo ug lokal nga mga tag-iya sa negosyo.

Sigon usab ni DSWD FO-7 Regional Director (RD) Shalaine Marie Lucero nga kining mga partner-retailers mahimong magamit sa pagsuplay sa food packages sa mga benepisyaryo sa FSP.

Ang unang redemption period sa mga food packages sa FSP beneficiaries magsugod sa Hulyo 18 ngadto sa 20 sa lungsod sa Cordova sa Sugbo nga adunay 159 ka rehistradong benepisyaryo ug sa lungsod sa Mabinay sa Negros Oriental nga adunay 773 ka rehistrado nga recipients.

Ang kasabutan gipirmahan ni DSWD FO-7 Regional Director (RD) Shalaine Marie Lucero niadtong Lunes, Hulyo 15, 2024 uban sa mga representante sa retailers gikan sa Cordova Multi-Purpose Cooperative ug RC Family Grocery Store sa Cordova, Cebu.

Ang susamang MOA gipirmahan usab sa regional director sa Central Visayas uban sa Honey’s Agrivet and General Merchandize, NENAFA, LMPC, CJM Minimart, ug Jera’s Grocery Store sa Mabinay, Negros Oriental.

Samtang sa laing bahin gipadala na sa kagamhanan sa siyudad sa Lapu-Lapu ngadto sa Isla sa Olango ang kinahon nga mga pagkaon isip pagpangandam sa dili maayong kahimtang sa panahon. Si Mayor Junard "Ahong" Chan mihimo sa maong lakang sa pagsiguro nga ang mga molopyo labi na sa mga mananagat dili mahasol sa ilang kahimtang ilabi na gayod kun wala na unyay mobiyahe nga pump boat sa maong lugar kon masinati na usab ang dagkong balud sa kadagatan.

Ang Isla sa Olango gilangkoban sa 11 ka mga barangay ug ang tulo nga naglakip sa Caohagan, Pangan-an ug Caubian ang nahimutang kini sa buwag nga mga Isla sa Olango sa Siyudad sa Lapu-Lapu. (BANAT NEWS)