Warrant of levy sa real property i-post sa publikong lugar

CEBU, Philippines —  Giaprobahan sa hunta probinsiyal ang resolusyon nga giduso ni Bokal John Ismael Borgonia nga nagrekomendar og dugang paagi sa pag-post ug pagpakatap sa impormasyon kabahin sa buhis sa real property alang sa mga tag-iya sa property kinsa napakyas sa pagbayad og buhis.

Ubos sa Section 258 sa Akta Republika No. 7160 kun “Local Government Code of 1991” nga ang nag-unang paagi sa pagpakaylap sa warrant of levy mao ang pag-mail o personal nga paghatag niini sa tag-iya sa real property, sa tawo nga adunay legal nga interest sa property, o administrator o ang mga nagpuyo kong ang tag-iya atoa sa gawas sa nasud o dili ma-locate.

Apan gawas niini, girekomendar nga ang warrant i-post dili lang sa entrance sa city hall lakip na sa publiko o talan-awon nga lugar sa mga barangay kong diin nahimutang ang real property ug kong diin nagpuyo ang tawong angay makahibalo.

Ang mga pahibalo sama sa Notice of Delinquency, Warrant of Levy on Real Properties, ug ang advertisement ug pagbaligya niini isulat ug i-post sa English ug sa bernakular aron mas masabtan sa mga tawo sa komunidad ang sulod sa maong mga pahibalo.

Kini aron sa pagsiguro nga ang hingtungdang mga tawo mapahibalo sa mga butang nga makaapekto sa ilang tagsa-tagsa sa ilang kabtangan ug aron makapangandam sila sa hustong pamaagi o aksyon nga buhaton sa wala pa kini i-advertise aron ibaligya.

Pinaagi usab niini, daling mapahibalo ang mga tawo sa mga sangpotanan sa dili pagbayad sa mga buhis sa real property ug malikayan ang dili angay nga paghikaw sa ilang mga kabtangan. (BANAT NEWS)