Mga taksi gitutokan

CEBU, Philippines — Human sa mga reklamo ug mga nasakpang mga drayber sa taksi nga nanikas ug nangilad og mga pasaherong delegado ning semanaha ang Regional Highway Patrol Unit (RHPU) sa Police Regional Office (PRO-7) nangusog karon sa pagpaniid aron pagsikop sa mga drayber nga namiktima pinaagi sa sobrang pagpaningil og plete sa ilang mga pasahero ilabi na sa mga delegado sa Palarong Pambansa 2024 nga gihimo sa siyudad sa Sugbu.

Ang RHPU-7 pinaagi sa pakig-alayon sa Land Transportation Office, Land Transportation Franchising and Regulatory Board ug Local Territorial Units ang Oplan Against Abusadong Taxi Driver.

Ang maong operasyon naglangkob sa estriktong inspeksyon sa meters sa mga taksi ug paghatag og stickers nga dunay hotline numbers sa RHPU-7 nga pwedeng direktang tawagan sa mga pasahero kun magbinuang ang ilang gisakyang taksi.

Giawhag sab sa PRO-7 ang mga pasahero nga magmatngon sa metric fares sa taksi dungan sa pagpahimangno sa mga abusadong drivers ug operators nga masakpan ra gihapon sila.

“While most of our PUV drivers in Cebu are honest, the police will be looking at those very few who may take advantage of the situation by overpricing.  The PNP and the LTFRB are closely working together to prevent this from happening and rest assured that proactive steps are being taken against these erring drivers,” matud ni PRO-7 Director Brigadier General Anthony Aberin.

Sayo niining semanaha, tulo ka mga taxi drivers ang nasakpang nag overcharging sa singil sa pletihan.

Ang tulo naaktohan mismo sa mga ahente sa LTO ug RPHU nga nagpakaaron-ingnong mga bag-ong abot nga delegado sa Palaro, inay nga gamiton ang ilang metrohan, nagpa pakyaw sila ug nangayo og mas mahal nga pleti. --  IBM BANAT NEWS