Mga batan-on gibansay kabahin sa basic life support

CEBU, Philippines — Gipaubos sa pagbansay bansay ang kabatan-onan sa Dakbayan sa Talisay kabahin sa Basic Life Support ug Hands-only Cardiopulmonary Resuscitation.

Kini maoy usa sa mga kalihukan sa Talisay City Disaster Risk Reduction and Management Office subay sa pag obserbar sa National Disaster Resilience month.

Si Joel Sisa, operation head sa CDRRMO nipahibawo nga niabot sa 170 ka partisipante ang miapil sa ilang pagbansay nga gikan sa youth sectors uban sa Sangguniang Kabataan (SK), Gender and Development (GAD) focal person, VAWC focal persons ug mga sakop sa LGBTQ+.

Nahibaw-an nga ang buhatan sa CDRRMO naghimo sa maong kalihukan ngadto usab sa tunghaan ug kabarangayan.

Matud pa ni Sisa nga mas labing maayo nga daghan ang makat-on sa basic life support kay sa higayon nga adunay magkinahanglan niini makasalbar kini og kinabuhi.

Siya nagkanayon nga ang emerhensiya mahitabo sa bisan kinsa ug bisan kanus-a.

Ang kaalam sa tawo sa basic life support gikinahanglan kaayo aron makatabang sa mga nagkinahanglan og tabang panahon sa emerhensya og lisod nga sitwasyon. (BANAT NEWS)