Ayuda sa mga estudyante sa Mandaue madawat na
CEBU, Philippines — Madawat na sa mga nigradwar sa senior high school sa Siyudad sa Mandaue ang P2,000 nga pinansiyal nga ayuda.
Si Mayor Jonas Cortes ug Bise Mayor Glenn Bercede ang motunol niini ngadto sa mga nahisgutang tinun-an.
Naglakip sa mga petsa nga himuon ang pagpanghatag mao ang Hunyo 25, 26, ug 28, 2024.
Sa laing bahin, giapod-apod sa mga personnel sa Department of Social Welfare and Development (DSWSD) ngadto sa liboan ka molupyo sa Siyudad sa Lapu-Lapu ang P3,000 nga cash assistance ubos sa Ayuda para sa Kapos ang Kita Program (AKAP).
Nasayran nga mao kini ang ikaduhang hugna sa pagpang-apod-apod sa nahisgutang ayuda nga gipahigayon diha sa hoops dome sa Barangay Gun-ob sa nahisgutang siyudad.
Si Mayor Junard “Ahong” Chan ug asawa niini nga si Kongresista Cindi King-Chan ang nitambong atol sa ceremonial distribution.
Ang AKAP usa kini ka programa nga gipasiugdahan sa nasudnong kagamhanan diin ang makabenepisyo niini kadtong mga molupyo nga kuwang ang kita alang sa matag adlaw niining panginahanglan.
Si Mayor Chan nibutyag nga ang mga barangay sa mainland maoy nakadawat sa nahisgutang pinansiyal nga ayuda ug isunod usab sa pag-apod-apod ang alang sa mga moloupyo sa kabarangayan sa Isla sa Olango. (BANAT NEWS)
- Latest
