Pulangbato nakasinati og pagdahili sa yuta

CEBU, Philippines — Dagkong mga bato ang natipak ug nidahili ang yuta gumikan sa pag-uwan diha sa Sitio Manguyas, Barangay Pulangbato, bukirang barangay sa Dakbayan sa Sugbo kagahapon sa buntag.

Ang dakong bahin sa bato nga natipak ug nabungkag maoy nakaali diha sa karsada nga agiana paingon sa Barangay Guba, laing bukiran nga barangay sa siyudad.

Hinuon walay gikatahong naangol sa maong insidente diin ang maong lugar nag nahitaboan layo ra kabalayan.

Ang Cebu City Disaster Risk Reduction and Management Office ang nipahigayon sa clearing operation diha sa lugar.

Si Kurt Russel Colindang, usa sa mga geologist sa Mines and Geosciences Bureau nihimo og assessment sa maong landslide.

Matud ni Colindang nga usa ka weathered and jointed volcanic rocks ang nidahili tungod kay gabok na nga nature niini ug natandog usab kini dihang gitrabaho ang karsada.

Si Colindang nagkanayon nga delikado pa agian ang maong dapit ilabi na kong padayon nga masinati ang pag-uwan-uwan.

Sa laing bahin, si Cebu City Acting Mayor Raymond Alvin Garcia niawhag sa mga molupyo sa siyudada nga manginlabot sa pagsulbad sa problema sa baha niining nagsugod na ang ting-uwan.

Kini human sa nasinati nga pagbaha diha sa pipila ka mga dapit sa siyudad diin nahitabo kini bisan og wala mo bundak ang uwan sa sentro nga bahin sa siyudad apan naggikan ang tubig sa bukirang dapit.

Si Garcia makigtagbo sa mga stakeholder nga nagtutok sa flood control sa siyudad alang sa pagpalig-on sa pagsulbad sa problema. (BDB) BANAT NEWS