Tabang Mandaue Program nakahatag na og P4M nga ayuda

CEBU, Philippines — Mokabat sa P4 milyones nga kantidad sa pinansiyal nga ayuda ang nahatag na sa kagamhanan sa siyudad sa Mandaue ngadto sa 220 ka mga Mandauehanon ubos sa Tabang Mandaue Program.

Kadaghanan sa nakadawat og cash aid mao ang mga senior citizen nga midangop sa maong programa nga gipasiugdahan ni Mandaue City Mayor Jonas Cortes.

Kini gigamit alang sa pagpalit og tambal, pagpa ospital ug burial assistance sa mga benepisyaryo.

Kadaghanan kanila nga midangop sa Tabang Mandaue Program mao kadtong mga molopyo sa kabarangayan sa dakbayan nga adunay gihambin nga balatian ug nagkinahanglan na og matag adlaw nga maintainance.

Lakip sa gihatagan og ayuda mao kadtong naghambin sa sakit nga diabetes, pagtaas sa uric acid, cholesterol ug uban pa.

Si Mayor Cortes maoy personal nga mitunol sa maong pinansiyal nga ayuda ug giabagan usab kini ni Bise- Mayor Glenn Bercede ug mga sakop sa konseho nga naglakip kanila ni Konsehal Jen Del Mar, Jimmy Lumapas, Malcolm Sanchez, Oscar Del Castillo ug pipila ka mga opisyal sa barangay. (BANAT  NEWS)