18 ka tawo mopasaka og kaso batok kang Rama

CEBU, Philippines — Gilaoman nga 18 ka tawo uban sa ilang gatusan ka supporters gikan sa Sanlakas ug ilang mga kaalyado ang magpanon ngadto sa City City Hall of Justice karong adlawa aron mopasaka og kaso batok kang suspended Mayor Michael Rama ug sa laing duha sa opisyales sa gobiyerno.

Ang maong mga reklamante parehong mga residente sa dakbayan ug Probinsiya sa Sugbo diin ilang ireklamo si Rama uban nila ni Ernesto Gregorio, Jr., direktor sa Department of Public Works and Highways-7, Rizalino Cabahug, direktor sa National Housing Authority-7 ug ang NHA.

Ang mga reklamante nangita sa deklarasyon isip urban poor beneficiaries, o Mandamus, Specific Performance with Fixing and Collection of Just Compensation ug makiangayon  nga financial assistance uban sa damages, interests ug legal fees.

Ang maong pagpasaka og kaso nitumaw human sa nahitabong demolition niadtong buwan sa Hulyo hangtud sa Nobiyembre tuig 2021 diha sa Barangay Duljo Fatima, Dakbayan sa Sugbo diin nakaapekto kini sa 200 ka pamilya ug ang 18 niini ang moduso og reklamo.

Giingong ang demolition gipahigayon nga wala ipaagi sa korte, walay court order, walay ordinansa o resolusyon nga magsuporta niini.

“This case is significant and instructive considering that the demolition affected about two (200) families. On the other hand, there are reportedly about twelve thousand (12,000) more residents similarly situated, in the city who would be affected by the implementation of proiects of the city in the future”, tipik sa reklamo sa grupo.

Ang mga reklamante gilangkuban nila ni Nicolas Abellar Sr., Tita Buico, Veronica Colonares, Novelardo Diacamos Jr., Gina Igot, Jefferson Igot, Emiliano Musolini, Gina Pitogo, Nancy Teves, Joselyn Lopez, Melonie Geraga, Victoria Lim ag, Nestor Calderon, Rowenda Saya-ang, Michelle Saya-ang, Nena Limbaga, Sylvia Segovia ug Josephine Enriquez.

Gitumbok sa mga reklamante nga niadtong tuig 2019, ang DPWH nibukas og bids alang sa implementasyon sa flood control project sa ilang lugar nga mokabat ngadto sa P600 milyones ug sa samang tuig, pipila ka personnel gikan sa maong ahensiya ang niabot ug nagpahibawo sa mga residente nga adunay itukod nga flood control II project diha sa ilang lugar.

Giingong ang maong mga personnel sa DPWH ni-commit ug ni-assured sa mga residente nga makiangayon ang bayad nga ihatag ngadto kanila.

Apan niadtong tuig 2021 natingala ang mga residente sa lugar nga adunay mga personnel gikan sa Department of the Welfare of the Urban Poor nga nimando kanila sa pagbiya sa lugar ug ipa-demolish ang ilang mga balay alang sa himuon nga flood control project.

Giingong dili tanan sa mga reklamante ang nahatagan og notice ug niadtong higayona walay kasigurohan ug walay gituki nga relocation site apan atol sa meeting and DWUP personnel nipahibawo kanila og duha ka options nga ilang ma-avail nga mao ang i-relocate sila o hatagan sila og financial assistance puli sa relocation. — /BBD (BANAT NEWS)