Mibadlong sa nag-maoy nadunggaban patay

CEBU, Philippines — Miresulta sa kamatayon sa 26-anyos nga lalake ang unta pagbadlong niini sa 40 anyos niya nga kainom nga nag-maoy , apan gidunggab naman hinuon siya niini diha sa dughan niadtong Mayo 19,2024 sa alas -4 sa kaadlawon sa National Road, Barangay Población, Dakbayan sa Toledo.

Ang biktima mao si Jenard Bareta, 26, residente sa Sitio Sta. Ana, Barangay Poblacion, Toledo City samtang ang suspek mao si Junrie Campania Anotado, 40, nagpuyo ra sab sa naasoy nga lugar.

Sa impormasyon sa Toledo City Police Station samtang nagpahigayon og mobile patrolling ang kapulisan sa National Highway sa Barangay Poblacion nabantayan nila nga dunay komosyon nga nahitabo usa ka lugar nga dunay mga nag-inom.

Giduol kini sa mga polis ug didto nahibaw-an nga dunay nahitabong pagpanunggab lugar.

Ang mga tawo sa dapit nitug-an sa kapulisan kung kinsa ang suspek maong nakahimo dayon sila og hot pursuit og operation ug nadakpan dayon kini ug na-recover sa kapulisan ang kitchen knife nga gigamit sa suspek sa pagpanunggab.

Base sa imbestigasyon sa kapulisan gainom ang biktima ug suspek apan matud pa adunay nakaaway ang suspek ug nagmaoy kini.

Niuwang matud pa ang biktima apan siya na hinoon ang gidunggab sa suspek sa dughan.

"Siyempre pagka lasing ka kasi talagang pag nasobrahan yung alcohol mo sa katawan kahit mabait ka sa totoong buhay binabago niya ‘yung personalidad mo, so ganun nga ‘yung nangyari," sigon ni Police Lieutenant Colonel Manolo Salvatierra, Hepe sa Toledo City Police Station.

Gidala pa sa City Disaster Risk Reduction and Management Office(CCDRRMO) ang biktima sa Toledo City Hospital aron gideklarar nga dead-on-arrival.  Nabibaw-an sa kapulisan sa ilang imbestigasyon nga ang biktima hilig gyud sa mouwang og dunay mga kasamok.

"Itong sitwasyon nato ay talagang nasaksak siya napuruhan din," ni Salvatierra pa.  Kasong homicide ang gipasaka batok sa suspetsado. – IBM BANAT NEWS