Ayuda sa mga kabus gihatag ubos sa AKAP Program sa gobyerno

CEBU, Philippines — Nakadawat og P 3,000.00 ang matag usa ka beneficiary ubos sa Ayuda para sa Kapos Ang kita Program (AKAP) nga gipasiugdahan sa administrasyon ni Presidente "Bongbong" Marcos Jr.

Ang ayuda dungan nga giapod-apod sa mga kongresista sa ilang mga distrito nga gipangulohan ni House Speaker Martin Romualdez.

Ang AKAP program maoy labing bag-ong programa sa kagamhanan nga nagtinguha sa paghatag og pinansiyal nga tabang sa katawhang Pilipinhon nga nanginahanglan ilabi na niadtong anaa sa labing ubos sa katilingban.

Base sa maong programa dili lamang ang gitawag og poorest of the poor ang makadawat sa hinbang kundili apil na usab kadtong dunay trabaho apan kuwang kaayo ang suweldo alang sa matag adlaw nga panginahanglan sa pamilya.

Sa gipahigayon nga pag-apod-apod sa ayuda, nangulo niini si Kongresista Cindi King-Chan uban usab si Lapu-Lapu City mayor Junard "Ahong" Chan ug mga sakop sa konseho nga gipangulohan ni bise mayor Celedonio Sitoy.

Suma pa ni Kongresista Chan sa iyang mensahe nga daghan sa katawhang Pilipinhon karon nga kuwang kaayo ang kita alang sa panginahanglan sa ilang pamilya nga maoy hinungdan nga namugna ang AKAP program sa nasudnong kagamhanan.

Niadtong Biyernes gilusad ang AKAP program sa Hoops Dome sa Barangay Gun-ob sa siyudad sa Lapu-Lapu ug gisaksihan usab sa kadagkoan sa DILG ug DSWD 7. MEL BANAT NEWS