Pagkaon sa mga atleta sa Talisay City gireklamo kay pan-os

CEBU, Philippines — Pagkaon sa mga atleta sa Talisay City nga nanuwa sa Central Visayas Regional Athletic Association (CVIRAA) niadtong Lunes sa gabii gireklamo nga pan-os ug dili sab maayo pagkaluto ang ilang pamahaw.

Tungod niini nga reklamo, gipatawag ni Mayor Gerald Anthony "Samsam" Gullas sa Dakbayan sa Talisay ang mga opisyal sa Department of Education Talisay City Division, kagahapon, Martes sa buntag.

Gikataho nga usa ka pribado nga caterer ang nag-suplay sa pagkaon sa mga bata. 

Sumala pa ni Gullas, adunay mga rason siyang nadawat nganung napan-os ang maong mga pagkaon pero sa pagtak-op sa adlaw maoy importante kaniya nga ang mga bata nalipay sa giandam sa DepEd ug sa gobiyerno kanila.

Dugang pa ni Gullas, nasabutan nila sa ilang tigum, aduna pa man silay dili mominos duha ka adlaw sa dili pa matapos ang CVIRAA.

Iyang giklaro nga kung dili kaya sa supplier pag-supply og sustansyado ug maayong pagkaon,  mangita nalang sila og lain nga mo supply niini tungod kay dili siya mosugot ang mga reklamo sa mga bata magbalik-balik ug adto hapak sa gobiyerno.

Gibutyag sa mayor nga kung makita nga daghan reklamo sa mga bata pwede dili kini nila bayran.

Ang mayor nitug-an nga wala hinuoy mga bata nga nakakaon aning pan-os nga pagkaron, apan iyang gusto kung naay reklamo kinahanglan aksyonan dayon.

Ang mayor nipadayag niini atol sa ilang meeting uban sa mga opisyal sa DepEd iyang gipakisayran kung unsa ilang plano bahin niini hangtud mahuman ang maong kalihukan.

Gitug-an sa mayor nga makighinabi unya siya sa tanan mga delegado sa Talisay nga naa kasamtangan gipahimutang sa Labangon Elementary School sa ilang mga plano mintras naa pay panahon aron ilang mapaabot sa gobiyerno.

Si DepEd Director Salustiano Jimenez nibutyag nga mohimo siya ug pakisusi sa maong insidente ug makigtagbo usab sila sa tanan mga opisyal sa DepEd aron malikayan ang susama nga insidente.

Gibutyag ni Jimenez nga sa iyang paglibot-libot sa mga billeting nga gipuy-an sa mga niapil sa CVIRAA malinawon ra man hinoon ug gani hugot nga seguridad usab ang gipatuman.

Gitug-an ni Jimenez, ang maong taho may kalabutan sa giingong pan-os nga pagkaon sa Labangon iyaha kini nga susihon.

Pipila ka mga atleta sa Talisay nibutyag nga nakapanimaho sila sa pagkaon nga bahong pan-os hinungdan wala nila gikaon.

Samtang ang boiled egg nga pamahaw sa buntag daw susama nga wala pa kini naluto nga nasulod sa pack lunch human sa dihang kini giablihan basa pa kaayo o giingong hilaw pa. IBM BANAT NEWS