Commitment order ni Tan gipaabot aron mabalhin na kini sa CCJ

CEBU, Philippines — Paaboton nga mogawas ang commitment order gikan sa korte aron ibalhin sa Cebu City Jail Male Dormitory si Aaron Karl Tan kini human siya gidakop niadtong Lunes sa hapon diha sa ilang panimalay sa A. Laura Street, Barangay Guadalupe, Siyudad sa Sugbo pinasikad sa warrant of arrest gumikan sa kasong murder ug walay piyansa nga gitugot ang korte alang sa iyang temporaryong kagawasan.

Si Tan maoy gitumbok nga suspect sa pag-hit and run kang Jeslar Uriel Larumbe, ang 23-anyos nga basketbolesta nga nakabsan sa kinabuhi niadtong Pebrero 4, 2024 sa alas 6:00 sa buntag diha sa Queen Road, Barangay Kamputhaw niining siyudad.

Sayo pa, ang suspetsado nihimakak sa maong pasangil batok kaniya ug nangangkon kini nga ang iyang amega maoy nag-drive sa iyang sakyanan diha nahitabo ang maong krimen.

Matud ni Police Major Mark Don Alfred Leanza, hepe sa Abellana Police Station nga nakakuha sila og mga ebidensiya nga nagtumbok kang Tan nga maoy responsable sa krimen.

Nasayran nga ang suspetsado ug biktima nagkalalis kini sa wala pa giingong gidumbol ni Tan si Larumbe.

Gikonsiderar na sa kapolisan nga sulbad na ang maong kaso ug gipaabot na lang ang arraignment sa suspetsado.

Samtang gidayeg sa Police Regional Office-7 ang Cebu City Police Office sa epektibong pagpahigayon og imbestigasyon sa kaso diin ang korte nipagawas og warrant of arrest batok sa suspetsado.

Gipasabot ni Police Lieutenant Colonel Gerard Ace Pelare, tigpamaba ni PRO-7 nga wala gidali-dali ang maong kaso bisan pa sa grabeng pressure sa publiko. BDB BANAT NEWS