Minglanilla nanghatag og kagamitan pagtubag sa problema sa tubig

CEBU, Philippines — Gipanghatagan og kagamitan alang sa pagtubag sa suliran sa tubig ang duha ka barangay sa Lungsod sa Minglanilla.

Si Mayor Rajiv Enad nihatag og hose, water tanker, mga baril, balde, semento ug generator set sa taga Barangay Campo 7 ug Campo 8 kini isip tubag sa problema sa kanihit sa tubig.

Matud pa ni Enad nga mahinungdanon kaayo sa mga barangay ang water system diin halos tanan nagproblema sa tubig gumikan sa grabeng kainit nga nasinati.

Nagkanayon ang mayor nga apektado ang suplay sa tubig ilabi na ngadto sa mga lagyong dapit.

Ang mga barangay na usab ang mohimo og pamaagi aron mabahin-bahin sa ilang molupyo ang tubig.

Samtang sa Dakbayan sa Mandaue, ang matag purok sa kabarangayan sa siyudad nidangop ngadto s buhatan sa Purok Development sa siyudad kabahin sa ilang problema sa tubig.

Ang nagpakabanang molupyo sa Purok Sayote sa Barangay Paknaan nipadangat sa ilang problema sa kalisod sa tubig gumikan sa grabeng huwaw.

Ilang gihangyo ang pagpaayo sa poso sa tubig diha sa ilang lugar nga taud-taod na nga wala magamit human kini naguba.

Ang maong hangyo gihatagan dayon kini og pagtagad sa buhatan sa General Development Services sa siyudad.

Ang maong poso nagamit na karon sa mga molupyo diha sa lugar diin naiban-iban ang ilang problema sa ka nihit sa tubig. (BANAT NEWS)