Kapin sa 100 ka sakyanan na-clamp sa road clearing operation

CEBU, Philippines — Gikataho sa buhatan sa City Traffic Management System (CTMS) sa Siyudad sa Lapu-Lapu ang 100 porsyento nga kaugmaran sa dalan A. Tumulak nga nahimutang sa Lapu-Lapu City Hospital ug sa road clearing operation nga ilang gipahigayon diin 66 ka sakyanan ang na-clump ug 107 ka sakyanan na-towing tungod kay nakalapas sa lagda nga gipatuman sa kadalanan.

Kini subay sa taho sa buhatan sa CTMS atol sa City Peace and Order Council meeting nga gihimo niadtong Abril 30, 2024.

Si Atty. Hans Sinugbohan, CTMS legal counsel nagkanayon nga ang siyudad nakakolekta og P700,000 ngadto sa P800, 000 nga kwarta gikan sa multa sa mga sakyanan nga naisyuhan og citation tickets.

Matud ni Sinugbohan nga sa unang quarter sa tuig 2024 naglakip sa bulan sa Enero niabot ngadto 1,875 ka drayber ang naisyuhan og citation tickets; 1, 936 sa bulan sa Pebrero ug 1,757 sa bulan sa Marso 2024.

Sa buwan sa Enero niining tuiga, nakabayad og multa ngadto sa City Treasurers Office ang 510 ka mga drayber, 626 sa Pebrero ug 643 usab sa bulan sa Marso 2024.

Dugang ni Sinugbohan nga malampuson usab ang ilang clearing operation atol sa mga dagkong kalihokan nga gipasiugdahan nga naglakip sa Ironman 70.3 Lapu-Lapu, Cebu, Iron Kids ug Reyna Bulakna Run.

Ang City Peace Order Council meeting gidumala ni Atty. Danilo Almendras nga maoy city administrator nga nagrepresentar ni Mayor Junard "Ahong" Chan isip CPOC chairman. (BANAT NEWS)