Motor batok motor, mga drayber parehong patay
CEBU, Philippines — Duha patay sa nahitabong disgrasya sa National Highway, Barangay Tubod, Lungsod sa Barili gabie sa adlaw'ng Sabado human duha ka motorsiklo ang nagkabanggaanay sa lugar.
Ang Honda XRM gimaneho ni Regin Tablezo Lañojan, 46, nagpuyo sa Barangay Tangil, Lungsod sa Dumanjug samtang ang laing motor kay Honda CFT nga gimaneho ni Ricky De Gracia Cuadero, 39, nagpuyo sa Barangay Pancil, Lungsod sa Barili.
Sa imbestgasyon sa Barili Police Station ang duha ka motorsiklo nagbiyahe sa managlahi nga direksyon. Si Lañojan gikan sa ilang panimalay nibiyahe paingon sa Proper sa Barangay Tubod, Lungsod sa Barili.
Samtang si Cuadero gabiyahe gikan sa Barangay Mantalongon paingon sa south bound direction sa Barili Proper.
Apan pag-abot matud pa sa naasoy nga dapit, si Cuadero samtang gadagan giingong nilapas sa pikas lane ug napadung sa kasugat nga si Lañojan.
Gumikan sa kakusog sa impact, nangalamba ang duha ka motorsiklo sa sementadong dalan ug ang mga drayber parehong nakaangkon og grabeng kadaot sa lawas. Gidali pa og dala sa Barili District Hospital ang duha aron matambalan apan gideklarar silang duha mga dead on arrival. — /IBM (BANAT NEWS)
- Latest
