Kaplag 2024 mosikad karong adlawa
CEBU, Philippines — Magpahigayon sa iyang tinuig nga paghandom sa pagkakaplag sa Balaang Bata karong adlawa, Abril 28,2024, ang Parokya sa San Nicolas sa Dakbayan sa Sugbo.
Matud pa ni Msgr. Rogelio Fuentes ang Kura sa San Nicolas ug Chairman sa Kaplag 2024 ila ning gibuhat agi og paghandum sa pagkakaplag ni Juan Camus sa Balaang Bata.
Apan, dili lang sa relihiyosong aspeto mohunong ang kalihokan tungod kay duna sab kini kulturanhong mga kalihokan sama sa streetdancing competition nga inabagan sa Kagamhanan sa Dakbayan sa Sugbo ug sa Sinulog Foundation Inc.
Unom ka barangay nga sakop sa parokya ang gikataho nga mosalmot sa streetdancing sama sa San Nicolas Proper, Pahina San Nicolas, Sawang Calero, Duljo Fatima, Suba, and Calamba nga magpasundayag sa ilang nagkadaiyang festival. Ablihan nila ni Mayor Michael Rama ug ni Msgr. Fuentes karong hapon ang street dancing o ritual competition atubangan sa mga contingents ug mga dumuduong.
Malaunom si Msgr. Fuentes nga magmalampuson ang pasundayag kay miabag sab sila Cinbeth Orellano, overseer, and Junjet Primor, overall Artistic Director, ug ang Executive Director sa Sinulog Foundation nga si Elmer “Jojo” Labella sa pagdumala sa street dancing competition. Busa gidapit si Msgr. Fuentes sa mga relihiyoso ug mga dumuduong sa pagsalmot sa Kaplag 2024.
“Gidapit nato tanan sugboanon nga saksihan ug makigsaulog nato ang pagkaKAPLAG sa milagrosong imahen ni Snr Sto Niño dinhi sa atong parokya sa San Nicolas. Tana sa Kaplag 2024,” matud pa ni Fuentes.
Gawas sa ritual competition may ganti sab nga nagpaabot niiadtong mga bata nga daw Sto. Niño nga giandam si Mgsr. Fuentes.
Di sab magutman ang dumuduong matud pa sa Monsinyor kay may mga food stall sa Kaplag Food Park sa may atubangan sa compound sa simbahan sa San Nicolas.
Human sa indigay sa sayaw, pangulohan ni Arsobispo Jose S. Palma ang Pontifical nga misa nga maoy motapos sa kalihokan karong adlawa.
Ang Kaplag 2024 inabagan Sinulog Foundation, Cebu City Tourism Commission ug sa Cultural and Historical Affairs Office.— IBM BANAT NEWS
- Latest
