Sayop ang LWUA

Gitataw gyud sa Office of the Government Corporate Counsel (OGCC) nga sayop ang gihimo sa Local Water Utilities Administration pagsuspenso nila ni MCWD Chairman Joey Daluz, unya nagtudlo kini og Interim Board nga modumala sa MCWD.

Ang OGCC pinaagi nila ni Atty. Solomon M. Hermosura ug Atty. Owen M. Vidad, miingon nga makahimo lang ang LWUA pag-takeover o paghimo’g intervention” kun ang local water district, sama sa MCWD, mapakyas pagbayad sa ilang loan obligation, kon mga utang.

Tubag ni sa OGCC sa suwat ni MCWD general manager Edgar Donoso dihang ang LWUA mitudlo og tulo ka Interim Board sa MCWD human nila imando ang pagsuspenso kanila ni Atty. Daluz, ug duha ka sakop sa MCWD Board.

Matud sa OGCC. “Section 61 (d) of LWUA Law provides for a single instance when LWUA may take over or intervene in the management and operations of a local water district, including the policy-making of the district, and that is when the district is in default of its loan obligation to LWUA.”

Nahibaw-an sa OGCC nga ang MCWD kanunay gyud nga nagbayad sa ilang loan obligation ngadto sa LWUA, ug gani miabot na lang og kapin P13 milyones ang ilang bayranan.

Mao diay nga isog kaayo sila si Atty. Daluz, General Manager Edgar Donoso ug mga kauban nga misukol sa LWUA kay duna diay sila’y gisaligan.

Giklaro pag-ayo sa mga abogado sa Office of the Government Corporate Counsel nga ang LWUA may katungod nga mopahulip sa mga opisyal nga nagdumala sa mga water district, kun pakyas kini sa pagbayad sa ilang mga utang.

Ang gustong sutaon sa LWUA kun nganong dako kuno kaayo ang Non-Revenue Water (NRW) sa MCWD nga mokantidad ni og minilyon ka pesos ug maoy nakapamenos sa ilang kita.

Hinoon, ang LWUA miingon nga gipangayoan sab nila og mga dukomento ang MCWD, ug wa kuno mohatag. Wa man kini giapil pagpangutana ni GM Donoso kun maka-imbestigar ba ang LWUA kun dako og “losses” nga tubig ang usa ka water district.

Mao diay tingali nga dili sab ganahan ang LWUA nga mopadangat niining maong isyu ngadto sa Korte, kay ang OGCC mihatag na man og legal opinion nga limitado ra ang gahum sa LWUA sa pag-take over ug pag-intervene sa gimbuhaton sa water district.

Ang akong gusto nga wa lang unta’y kagubot nga makabalda sa panerbisyo sa MCWD paghimo’g mga water project nga kapahimuslan sa katawhan.

Unta, ang mga kontraktor sa MCWD mokuha gyud og mga dukomento aron mahatagan dayon sila’g mga permit sa City Hall, kay naa ra bay uban nilang kontraktor, way klaro, dili maayo motrabaho.