Karambola sa subway, unom naangol
CEBU, Philippines — Nagkarambola ang duha ka motorsiklo, usa ka Ceres bus ug usa ka pribadong sakyanan pasado alas 3 sa kaadlawon kagahapon, Abril 22 diha sa subway tunnel sa Natalio Bacalso Avenue, Barangay Basak San Nicolas, siyudad sa Sugbo diin unom ang angol.
Ang driver sa Yamaha Aerox nga motor mao si Florito Tabas Montecillo Jr., 31, ug iyang angkas nga si Baby Shane Garcia, 25 anyos, ang duha pulos residente sa Sitio Paradise 2, Kinasang-an, Cebu City.
Si Petronilo Sarte Flores, 32 anyos, nga taga Alambijud, Lungsod sa Argao maoy driver sa Ceres Bus. Apil sa nahitabong karambola mao ang Hyundai Accent nga gimaneho ni Brett Lois Abelgas Go, 26, taga Camparville, Buhisan.
Ang mga sakay niini mao sila si Crystal Mae Tan Yang, taga Habitat, Barangay Bulacao; Diane Therese Dolino, 26 anyos, residente sa Pardo ug Jeshua Queer Tedait, 29 anyos molopyo sa Barangay Tisa.
Samtang ang laing motorsiklo nga naapil sa karambola mao ang XRM nga gimaneho ni Ernest Canuto Socorro Larrobis, 53, residente sa Poblacion Ward 1, Lungsod sa Minglanilla.
Base sa imbestigasyon sa Traffic Enforcement Unit sa Cebu City Police Office(CCPO) nga ang motorsiklo nga Aerox ug Hyundai Accent padulong sa Pardo. Gauna ang Aerox nga motor ug gasunod ang Hyundai Accent nga sakyanan.
Sa pikas lane ang XRM nga motor ug Ceres bus gabiyahe padong sa Mambaling. Nag-una ang XRM samtang gasunod ang Ceres Bus.
Apan pag-abot matod pa sa subway tunnel ang XRM nga motorsiklo nawagtangan og kontrol hinungdan nga natumba kini ug naangol. Nakabantay matud pa ang bus nga ang driver sa XRM naghigda sa dalan maong gitumban niini ang brake sa bus. Apan gumikan sa kadangog sa dalan nawagtangan og kontrol ang bus driver nga miresulta nga nibabag sa pikas nga lane ang bus ug nabangga kaniya ang Aerox nga motor ug Hyundai Accent.
Gumikan sa impact ang driver sa Aerox ug ang iyang angkas natumba ug naangol samtang ang Hyundai Accent nakaangkon og kadaot ug naangol sab ang tulo ka mga pasahero.
"Arrested nato ang Party B katong driver sa bus, naa sa atong opisina sa TEU...Reckless Imprudence Resulting physical injury and damage to property(possible case), for now wala pa sila ana (settlement)," sigon ni Police Major Jonathan Dela Cerna, hepe sa Traffic Enforcement Unit sa Cebu City Police Office. (BANAT NEWS)
- Latest