Opisyales sa tulo ka lungsod nihangyo og assessment sa pletehan sa barko

CEBU, Philippines — Niapelar ang mga opisyal sa tulo ka lungsod sa Isla sa Bantayan nga mohimo og assessment sa pletehan sa barko diin ang rota gikan sa pantalan sa Hagnaya, Lungsod sa San Remigio padulong sa pantalan sa Santa Fe, Isla sa Bantayan.

Kini gumikan sa giingong overpriced fare rates sa biyahe sa mga barko sa nahisgotang rota.

Ang opisyales sa Lungsod sa Santa Fe, Bantayan ug Madridejos ang nihangyo sa Probinsiya sa Sugbo nga mo apil sa diskusyon uban sa mga kompaniya sa barko ug ubang stakeholders kalabot sa pletehan sa mga pasahero ug sakyanan.

Base sa taho sa Capitol Information Office, si Paul Rodriguez, CEO sa Super Shuttle operator sa Asian Marine Transport Corp. nagkanayon nga gawas sa presyo sa krudo ug sweldohan nga nakatampo sa pagsaka sa presyo sa pletehan, ang frequency o kapila ka higayon nga biyahe ang angay usab ikonsidera hilabina nga bisan og gamay o daghan ang pasahero ang scheduled trips kinahanglang tumanon.

Ang CEO usab sa Island Shipping Alex Tan nagkanayon nga ni-invest sila sa paghimo og bag-o ug dagkong barko alang sa rota sa Hagnaya–Santa Fe.

Ang plete matag pasahero sa Island Shipping gikan Hagnaya padulong sa Santa Fe anaa sa P300 samtang P359 usab ang sa Supper Shuttle.

Atol sa tigom nga gipatawag karong semanaha ni Gobernador Gwendolyn Garcia tali sa opisyales sa LGUs, kompaniya sa barko ug ubang stakeholders, ang opisyales sa tulo ka lungsod nagkanayon nga mas dako itandi sa ubang rota gikan ug padulong sa Cebu nga pareho ang distansiya ug oras sa biyahe.

Ug tungod niini giawhag ang Maritime Industry Authority (MARINA) uban sa LGUs ug kompaniya sa barko nga mohimo og reassessment sa kasamtangang rate sa plete.

Ang direktor sa MARINA-7 Annabelle Lagas nisaad nga mo coordinate sila sa mga concerned nga stakeholders aron makakab-ot ang solusyon kalabot sa concern sa opisyales.

Apil sa ikonsidera sa himuong reassessment ang historical data, traffic patterns, inflation, minimum wage standards ug uban pa.

Gipaabot nga ang stake holders magtigom og balik aron hisgotan ang proseso sa himuong assessment diin gipaabot nga masuta ug madesisyonan na ang revised rates nga ipatuman. BDB BANAT NEWS