Face-to-face classes sa Talisay padayong gisuspenso

CEBU, Philippines — Padayon nga gisuspenso ang face-to-face classes sa pampublikong tunghaan sa Dakbayan sa Talisay.

Sayo pa, si Mayor Gerald Anthony “Samsam” Gullas, Jr. nipahibawo nga kutob sa Abril 14, 2024 ang pagsuspenso sa klase.

Apan ubos sa kamandaan ni Gobernador Gwendolyn Garcia si Gullas mosunod niini hangtud nga libkason sa gobernador ang kamandoan.

Si Gullas nisuspenso sa face-to-face classes tungod sa grabe nga kainit sa panahon diin gisiguro niya ang kaluwasan sa mga tinun-an ug magtutudlo.

Nihangyo ang mayor sa mga kabataan nga bisan og ubos sa modular nga paagi sa pagtuon sigurohon nga makakuha og dagko nga grado.

Nakig-estorya na usab si Gullas kang Dr. Richel Bacaltos, presidente sa Talisay City College (TCC) kalabot niini ug ang naulahi nipahibawo nga nagpahigayon na sila sa blended learning.

Samtang sa mga pribadong tunghaan sa siyudad gitugyan ni Gullas sa mga tagdumala niini ang desiyon kabahin sa ilang sestema sa pagpahigayon og klase sa sitwasyon karon nga grabeng kainit.       .

Subay niini, si Mayor Cesar "Didoy" Suan sa Lungsod sa Cordova makigtagbo sa mga nanag-iya og mga tunghaan, school principals o school administrator sa mga pribado nga tunghaan sa lungsod.

Ang maong consultative meeting ipahigayon diha sa conference hall sa bag-ong municipal building.

Nasayran nga atol sa tigom sabotan sa LGU Cordova ug mga tag-iya lakip na sa mga school principal o school administrator kong angayan na nga ibalik ang face-to-face classes sa mga pribado nga tunghaan sa tibuok Lungsod sa Cordova.

Matud ni Suan nga kong unsay ilang matuki og masabotan nga desisyon sa maong panagtigom uban sa DepEd Cordova Officials ilaha dayon kini nga ipahibalo aron masayran sa publiko.

Gilantaw sa mga opisyal sa lungsod ang kaluwasan sa tanan ilabi na niining nasinating kainit sa panahon tungod sa epekto sa El Niño. — /BDB (BANAT NEWS)