Programa sa mental health angayan na nga ipatuman

CEBU, Philippines — Giawhag ni Cebu City councilor Mary Ann de los Santos ang executive department nga ipatuman ang mga programa alang sa mental health nga gilatid sa napasar nga ordinansa sa siyudad human sa gikatahu nga mga suicide cases sa dakbayan.

Nonot sa nagkataas nga kaso sa problema sa mental health ilabi na ang kaso sa mga hikog si konsehal delos Santos kinsa maoy Chairperson sa Committee on Mental Health miingon nga aduna nay assistance kabahin sa mental health ang siyudad nga mahimong mapahimuslan na sa katawhan.

Suma sa konsehal nga aduna nay mga ordinansa diin siya ang nigama nga napasar na sa konseho nga maghatag og student assistance ug employee assistance program.

Ang student assistance program mag atiman sa mga tinun-an nga gipahiluna sa mga tunghaan sa pakig alayon sa Department of Social Welfare and Services (DSWS) nga adunay gahin nga P10 million.

"So I hope that should be implemented," suma ni de los Santos.

Dugang niya nga ang maong student assistance magsugod sa detection kun pagkabantay sa mga maestra ug i refer kini ngadto sa DSWS o ba kaha ngadto sa Barangay Behavioral Unit aron himoon gilayon ang intervention.

Gawas niini ang mga magtutudlo kinahanglan makig-coordinate sa mga Guidance Counselor ingon man maghatag usab ang programa og mga Psychologists ug Psychiatrists nga motabang sa usa ka indibidwal.

Samtang ang employee assistance program nga bag-ohay lang usab nga naaprobahan maghatag og mental health assistance ngadto sa mga empleyado nga karon unang gipatuman diha sa Cebu City Hall.

"Makakita man tas atong mga empleyado. Some are from the house going to report to the house, mentally disturbed because nag-away sa bana, naay financial problems, naay marital problems, so madala sa trabaho, inig kadala sa trabaho ang mahitano ang mahitabo walay maayo nga output," suma ni de los Santos.

Subay niini gidugang niya nga dunay dakung impact ang maong programa kun ang matag barangay sa siyudad mopatuman niini diha sa ilang kaugalingon nga BBHU.

"Nganong di man na na nila i-implementar? Dugay naman kaayo na. Og ila pa unta ni gi implementar sauna, the information dissemination must have reached to the far-flung areas already," dugang pa niya. — /MEL (BANAT NEWS)