Driver nga hapit makaligis og nagmotor gidakop

CEBU, Philippines — Gidakop ug gidala sa buhatan sa City of Talisay-Traffic Operation Development Authority (CT-TODA) ang drayber sa trailer truck nga hapit gyud makaligis sa nagmotorsiklo diha sa Cebu South Coastal Road (CSCR) kagahapon sa buntag.

Si Jonathan Tumulak, pangu sa CT-TODA niingon nga ilang gidala sa ilang buhatan ang drayber aron ma imbistigaran.

Ang girason sa maong driver mao nga nitambong siya sa trabaho niadtong Sabado sa alas 8 sa buntag ug nahuman alas 3 na sa kadlawon sa Domingo.

Nipahuway na unta siya apan gipukaw sa alas 7 sa buntag aron padraybon nasab.

Giangkon sa driver nga kuwang gyud ang iyang katulog hinungdan nga iyang naligsan ang traffic cone ug nakalikay sa nag una nga motorsiklo.

Ang panghitabo nakuhaan og footage sa CCTV camera nga gamay nalang gyud og kuwang mapisat ang nagmotorsiklo.

Si Tumulak nagkanayon nga ilang pasakaan og reklamo ang drayber ug operator sa buhatan sa Land Transportation Office (LTO) gawas sa ilang pag isyu og reckless driving sa drayber. — /MEL (BANAT NEWS)