Tinubdan sa ilegal nga drugas gitutokan

CEBU, Philippines — Gisubay karon sa Regional Intelligence Division sa Police Regional Office (PRO)-7 ang mga operasyon sa tanang police units kung asa gyud gikan ang supply sa ilegal nga drugas sa rehiyon.

Una niini, si PRO-7 director Brigadier General Anthony Aberin mipadayag nga gusto niyang mahibaw-an kun asa gikan kining mga ilegal nga drugas nga gibaligya dinhi sa iyang hurisdiksyon aron masanta ug mahunong ang pagkuyanap niini dinhi.

Kun kahinumdoman, bisan sa panahon sa duguong drug war ni kanhi presidente Rodrigo Duterte, midaghan og maayo ang suplay sa ilegal nga drugas ilabi na ang shabu dinhi sa rehiyon.

Kini bisan pa man miabot na og bilyon ka pesos nga ilegal nga drugas ang nasakmit sa mga law enforcement agencies sa rehiyon sa panahon ni Duterte hangtud ning panahona.

Gani kaniadto maihap lang ang mga drug suspects nga makuhaan og tunga sa kilong shabu, apan karon kinilo na ug ang mga dinakpan gitawag sa mga polis og “newly-identified drug players” ug duna pay gitawag nilang “bodegero o bodegera” sa ilegal nga drugas.

Naa sab kanunay sa mga balita nga ang mga dinakpang bukas kaayong nangangkon nga duna silay kontak nga mga priso sa mga prisohan nga maoy naghimo sa transaksyon ug sila tighatud lamang sa ilegal nga drugas bugti sa suhol.

Mao na kini ang pirmeng linya sa tanang mga bag-ong nangadakpan, apan daw walay nahimo ang mga otoridad gawas anang pagdakop ug wala sa pagsubay kun tinuod ba nga mga inmates sa mga prisuhan maoy naghimo sa transaksyon ug kun giunsa nila kini paghimo nga gwardiyado man ug gidili ang mga cellphones sa maong mga pasilidad.

Sigon nj Police Lieutenant Colonel Gerard Ace Pelare, tigpamaba sa PRO-7 gilusad nila karon ang “highly analytical drug supply reduction strategy.”

Subay sab kini sa direktiba sa bag-ong Chief PNP General Rommel Marbil nga mimando nga patun-an gyud ug tutokan ang supply reduction sa ilegal nga drugas sa mga rehiyon. "We do not focus on the number of arrested persons but kung kinahanglan ang supply gyud ma neutralize. Unya lahi man gud ang atong setup diri sa Central Visayas because this is a transhipment point of illegal drugs in Visayas and Mindanao so daghan moagi diri nga supply not only intended for Central Visayas but for other Regions in Visayas and some parts of Mindanao so makita ninyo ubay-ubay gyud drugas ang atong nanga-intercept because daghan mang moagi pud diri nga illegal drug supply," pangangkon pang Pelare. (BANAT NEWS)