OBO nimando og suspension sa condo diin  natagak ang bata

CEBU, Philippines — Ang Office of the Building Official sa Dakbayan sa Sugbo nipahigayon na og pakisusi sa condominium nga adunay bata nga natagak patay ug nimando og temporary suspension sa dapit diin nahitabo ang insidente aron dili na kini masubli og pasubmitiron og architectural design ang tagdumala sa maong condominium.

Kini ang gibutyag sa hepe sa OBO Architect Florante Catalan kinsa nangulo sa maong pagsusi sa condominium.

Matud ni Catalan nga ilang gi-verify ang hinungdan sa maong insidente sa pagkahulog sa bata gikan sa 27 ka andana sa condominium.

Si Catalan nagkanayon nga ang maong condo adunay duha ka design diin ang usa adunay terrace samtang ang usa wala.

Gibutyag ni Catalan nga magpaabot pa siya sa incident report gikan sa management sa maong condominium diin police report pa ang ilang gihuptan karon.

Temporaryong gisuspenso ang habig sa condo diin nahitabo ang insidente samtang nagpaabot pa ang OBO sa iduso nga architectural design aron wala nay susama nga insidente ang mahitabo sa umaabot.

Sa pagkakaron wala nay tawo ang dapit diin adunay natagak nga bata.

Nasayran nga nag-abang ang nag-ukopar niini ug giingong wala kini mo deklara nga aduna sila y bata nga kauban giingong pulos sila mga hamtong. (BANAT NEWS)