Ginikanan sa rugby boys ipaimbestigar ni Zafra

CEBU, Philippines — Usa ka konsehal sa Dakbayan sa Sugbo nagplano sa pagduso og ordinansahon nga nagtinguhang mopahamtang og silot sa mga rugby boys ug sa ilang mga ginikanan nga nagpabaya.

Kini human sa usa ka video nga nag-viral diin adunay grupo sa mga batan-on ang nisakay og public utility jeep unya nagdala og rugby sulod sa plastik ug naghingos.

Usa ka Jussil Princess Da o ang nag-post sa maong video diin base sa iyahang post nisakay diha sa may Fuente ang mga bata ug nagtuo siya nga manaygonay o mangayo og sinsilyo apan nakurat siya tungod kay naghingos og rugby ang mga bata ug nagtubag-tubag sa pasahero nga nibadlong.

Nasayran nga ang kagamhanan sa Siyudad sa Sugbo nihimo na og imbestigasyon mahitungod                                                                  niini.

Ug gisubay na sa City Social Welfare and Development ang identities sa mga bata apil ang ginikanan nila matud ni Konsehal Phillip Zafra, chairman sa committee on peace and order sa konseho sa siyudad.

 Atong gitahasan atong DSWS nga i-trace ning mga bataa. Sutaon nato sila kay gusto nato masuta sad even ang mga ginikanan ani", padayag ni Zafra.

Gusto usab nga masayran sa kagamhanan sa Siyudad sa Sugbo gikan sa mga ginikanan nganong wala mabantayi ang mga bata ug nganong nagumon sa bisyo.

Si Police Major Mark Don Alfred Leanza, hepe sa Abellana Police Station sa Cebu City Police Office nagkanayon nga duha sa lima ka bata ang na-rescue nila ug gitugyan na nila sa mga hingtungdang barangay.

Samtang si Zafra nagkanayon nga ipaubos usab sa imbestigasyon ang mga ginikanan sa maong mga menor de edad.

"Akong gusto  nga ang mga ginikanan gyud ang imbestigaron, ang pangutan-on nganong na ingon ato to nga  sa kalinghod sa pangedaron nganong napasagdan man ang mga anak", matud ni Zafra.  (BANAT NEWS)