Babaye nga nabiktima sa illegal recruitment na-rescue sa BOI
CEBU, Philippines — Usa ka babaye kinsa ilegal nga gi-recruit aron motrabaho isip tutor ug katabang sa balay naluwas sa mga immigration officer diha sa Mactan-Cebu International Airport.
Ang hepe sa BI Immigration Protection ug Border Enforcement Section Bienvenido Castillo nitaho kalabot sa pag-intercept sa usa ka babaye nga biktima kinsa nisulay sa pagbiya sakay sa Philippine Airlines flight paingon sa Bangkok niadtong Abril 2, 2024.
Ang biktima usa ka 26-anyos diin wala kini hinganli subay sa pagsunod sa anti-trafficking laws nibutyag nga gi-sponsor siya sa usa ka Chinese national nga iyang nahimamat diha sa social media.
Gibutyag sa maong babaye nga gikuha siya isip private tutor ug katabang sa panimalay ug gisaaran nga makadawat og P25 mil nga sweldo matag buwan.
Giingong bisan pa sa nasayran nga ilegal ang pag-recruit kaniya niisistir gihapon ang maong babaye nga mobiya.
Si BI Commissioner Norman Tansingco nipasidaan sa online recruitment human ilang naobserbahan nga daghan niining mga biktima sa trafficking ang gi-recruit pinaagi sa message o grupo sa social media.
Si Tansingco niawhag nga likayan ang paglingaw diha sa mga social media ug maayo nga mo apply pinaagi sa legal nga paagi diha sa Department of Migrant Workers.
Ang kaso sa maong babaye gi-endorso sa MCIA Inter-Agency Council Against Trafficking alang sa dugang imbestigasyon batok sa iyang mga recruiter. (BANAT NEWS)
- Latest
