Sunog sa Sambag 2, nausban

CEBU, Philippines — Human sa gatusan ka pamilyang naapektahan sa dakong sunog sa tulo ka Sitio sa Barangay Sambag 2 ning Dakbayan sa Sugbo, Lunes sa hapon nausban na sab kini og laing sunog sa usa gihapon sa mga sitio nga naigo sa sunog adtong Lunes.

Ang laing sunog niulbo sa usa sa mga balay sa sitio Brupa pipila lang ka metros gikan sa fire scene niadtong adlaw nga Lunes. Kagahapon sa hapon, adlaw nga Martes niulbo ang sunog sa balay nga iya ni Roel Derecho.

Ang maong sunog giisa lang sa 1st Alarm og nakontrolar sulod sa 18 minutos apan naugdaw gyud ang balay niini, nagbilin kini og P15 mil nga danyos samtang wala pa sab masuta kun unsay sinugdanan niini.

Ang mga sitio nga apektado sa pag-ulbo sa mas dakong sunog niadtong adlaw nga Lunes mao ang Sitio Riverside, Kalubihan ug ang Brupa sa maong barangay.

Base sa talaan sa Department of Social Welfare and Services 98 ka panimalay ang apektado sa sunog diin 91 ang hingpit nga naugdaw ug pito ang partial nga nakan-an.

Niabot ngadto sa 255 ka pamilya o 728 ka individual ang apektado sa maong sunog.

Matud pa ni Portia Basmayor ang pangulo sa DSWS kasamtangan nga nagpasilong ang dili mominos sa 30 ka pamilya sa evacuation Center nga mao ang City Central National High School, ang uban nagpabilin sa dapit diin niulbo ang sunog ug adunay pipila ang gikuha sa ilang kaparyentihan.

Sumala pa ni Basmayor,  unom ka mga classroom ang gigimit sa maong tulonghaan isip kasamtangan nga kapasilongan sa mga nasunogan.

Niapud-apod na usab ang DSWS ug pagkaon sulod sa tulo ka adlaw ug preparahon usab gilayon nila aron mahatag na usab gilayon ang financial assistance para sa biktima sa sunog. Samtang si Mayor Michael Rama sa iyang bahin mimando nga i- reblocking ang lugar tungod sa reklamo sa kabomberohang nga naglisud sila sa pagsud sa lugar tungod sa kahagip-ot sa lugar.

Ang kabomberohan padayon pa sa ilang imbestigasyon ug wala nila gisalindot ang pagtutok sa giingong mibuto nga aircon unit.

Ang maong sunog giisa hangtud sa 4th alarm og nidanyos ngadto sa P7.5 milyones.  IBM BANAT NEWS