Araw ng Kagitingan gisaulog sa lain-laing lugar

CEBU, Philippines — Gisaulog sa nagkadaiyang dapit ang Araw ng Kagitingan diin gipasidunggan dili lang kadtong mga bayaning mitaliwan kon dili labaw sa tanan kadtong mga buhing bayani sama sa mga war veterans.

Gipahigayon ang Day of Valor Commemoration sa Plaza Independencia nga gitambongan sa mga war veterans uban ang mga opisyal sa Cebu City.

Gihimug-atan sa mga opisyal ang kamahinungdanon sa paghandum sa natampo sa mga beterano kinsa nakigbisog alang sa nasod ug gipahigayon usab ang paghalad sa buwak.

Atol sa kalihukan gipahibalo usab ni Cebu City Mayor Michael Rama nga hatagan og tag 100 thousand ang upat ka mga awardee nga ipaagi kini sa ipalabang nga resolusyon sa konseho sa siyudad.

Si Konsehal Joel Garganera nitug-an nga ilang tukion sa umaabot nga session sa konseho ang tinguha nga paghatag sa assistance sa upat ka mga beterano.

Dugang pa ni Garganera, pabor siya sa maong tinguha ug angayan nga ihatag kini sa dinalian nga panahon apan magdepende kini sa City Treasurers Office ug Budget Officers sa siyudad. Samtang mga sakop sa Lapu Lapu City Police mipahigayon usab ug flag raising ceremony sa Lapu-lapu City Police Office Grounds isip pagtimaan sa Araw ng Kagitingan.

Lakip sa nisaulog sa kalihukan ang kagamhanan sa siyudad sa Mandaue diin gihimo ang gun salute sa mga sakop sa Special Weapons and Tactics (SWAT) sa Mandaue City Police Office (MCPO ubos sa kamandoan ni Police Colonel Julius Sagandoy ang direktor sa kapolisan sa siyudad sa Mandaue.

Gihimo usab ang paghalad sa mga buwak nga gipangulohan ni Mandaue City Mayor Jonas Cortes.                     .

Apil sa gipasidunggan ug gidayeg ang mga Modern Day Heroes sa ilang pagsakripisyo pagluwas sa isigka-tawo panahon sa kalamidad. MEL BANAT NEWS