Rama nangayo’g pasaylo tungod sa batang namatay sa CCMC

CEBU, Philippines — Si Mayor Michael Rama sa Dakbayan sa Sugbo nangayo og pasaylo sa ginikanan sa 6-anyos nga batang babaye nga namatay samtang samtang naka confine sa Cebu City Medical Center.

Ang mayor nipadayag nga iyang angkunon ang full responsibility sa kamatayon sa maong bata tungod kay siya man ang mayor ug dili siya molihay niini.

Gimando usab niya kang City Administrator Collin Rosell, kinsa kasamtangan nga CCMC Administrator sa pagpahigayon sa imbestigasyon ug ipaagi sa due process ang tanan.

Ang inahan sa bata nga si Mylene Faburada miingon nga nasakit ang anak human nakakaon og lamaw nga butong nga gihatag sa silingan ug nagsuka kalibang.

Niadtong Marso 31 ilaha kining gidala sa CCMC apan nasagmuyo siya kay naabtan sila og pipila ka oras ayha pa naatiman ug gihatagan og reseta.

Nipauli sila human nigawas sa urine ug blood count test nga normal ra tanan apan pagabot sa ilaha nagmulo na sab ang bata maong gibalik nila og dala sa CCMC apan didto nakabsan kini sa kinabuhi.

Wala nakasabot ang inahan sa iyang gibati tungod kay sa death certificate ang nakabutang pneumonia ang gikamatyan sa anak.

Giawhag sa mayor ang City Hospitalization Assistance and Medicines Program ug Department of Social Welfare and Services nga tabangan ang pamilya sa namatay.

Ang mayor gusto usab nga ipahigayon ang imbestigasyon aron masayran kung kinsa gayud ang angay manubag sa nahitabo. (BANAT NEWS)