Supply sa tubig sa mga barangay sa Cebu City ug Mandaue nagnihit na

CEBU, Philippines — Mga supply sa tubig sa kabukiran sa Dakbayan sa Sugbo nihinay na hinungdan nga girekomendar karon ngadto kang Mayor Michael Rama ang pag-construct sa dams, water catchment aron dili masayang ang ubang tubig.

Kini ang gibutyag ni Konsehal Phillip Zafra, chairman sa peace and order sa siyudad kinsa nibisita diha sa upat ka bukirang barangay sa siyudad.

Matud ni Zafra nga ilang giawhag ang mga barangay kapitan nga susihon ang ilang mga tinubdan sa tubig diin sigurohon nga mapreserba kini ug madaginot.

Gibutyag ni Zafra nga iyaha usab nga gipa-inventory sa mga kapitan ang tanan nilang tinubdan sa tubig.

Ang upat ka nahisgutang barangay nga nabisita gilangkuban sa Tagbao, Tabunan, Sudlon 1 ug Bonbon.

Si Zafra nagkanayon nga giplanohan nila karon sap ag-explore pa og daghang tinubdan sa tubig diha sa mga bukiran nga barangay sa siyudad.

Ug morekomendar siya kang Rama sa pag-priority sa pag-construct sa dams, water impoundment/catchments aron matigom ang tubig.

Samtang sa Dakbayan sa Mandaue gigamit karon sa kagamhanan sa siyudad ang ilang mga sakyanan nga nagkarga og tangke sa tubig alang sa paghatud ngadto sa mga barangay nga nakasinati og pagnihit sa supply sa tubig

Gimandoan ni Mayor Jonas Cortes ang Department of General Services sa paghatud og tubig sa mga lugar nga nagnihit ang agas sa gripo sa Metropolitan Cebu Water District. Romeo T. Limpangog (BANAT NEWS)