Oplan Disiplina gipahugtan pa ang implementasyon
CEBU, Philippines — Gipahugtan pa sa pagpatuman ang Oplan Disiplina sa Dakbayan sa Sugbo kini ang gibutyag sa chairman sa peace and order sa konseho nga si Konsehal Phillip Zafra.
Matud ni Zafra nga niadtong nilabay nga adlaw nagpahigayon sila og tigom uban ang city director sa kapolisan, police station commander, DSWS, PROBE, CCTO, DPS ug representante sa buhatan ni Mayor Michael Rama aron magpahigayon sa evaluation and assessment sa Oplan Disiplina.
Ug isip chairman sa Peace and Order gusto ni Zafra mga pahugtan pa ang pagpatuman sa curfew ordinance ug pagkanselar sa tanang special permits nga gihatag sa tanang bars nga anaa sa 100-meter radius sa simbahan ug eskwelahan.
Atol sa maong tigom gituki usab ang pagpahugot sa implementasyon sa anti-jay walking ug pag-establisar sa PUJ/PUB stops, lakip usab ang pagpataka og labay sa sagbot ug pagpanigarilyo sa mga pampublikong dapit.
Lakip sa gituki nga ang kapolisan ug BPLO gitahasan nga makig-alayon sa mga bar management alang sa mga balaod sa siyudad diin dugang mga lihok ang pagabuhaton unya sa umaabot nga adlaw tungod kay responsibilidad sa mga tag-iya sa bar ang pagtan-aw sa safety and security sa ilang balay patigayon.
Dugang ni Zafra nga human sa ilang tigom ilaha dayong giimplementar ang natuki alang sa Oplan Disiplina sa siyudad. (BANAT NEWS)
- Latest
