70 ka ektarya nga bukid sa oslob apektado sa grass fire

CEBU, Philippines — Niabot ngadto sa 70 ka ektarya nga kabukiran sa lungsod sa Oslob ang apektado sa halapad nga grass fire.

Sumala pa sa Oslob Fire Station nagsugod ang maong sunog ala una pa sa hapon adlaw nga Sabado apan nataho kini sa kabomberohan alas otso na sa gabii.

Naglisod ang kabomberohan sa pagkontrolar sa kayo tungod usab sa kakusog sa hangin, diin alas dos na sa kadlawon sa adlaw nga Domingo kini nakontrolar.

Giingong nagsugod ang grassfire sa upper calumpang ug niabot kini ngadto sa kabukiran sa Barangay Poblacion, Cañang ug Daanglungsod.

Gawas sa kainit sa panahon gisusi pa usab sa kabomberohan kung unsa ang hinungdan sa pag-ulbo sa kayo, sumala pa ni SFO1 Pitz John Romeo, fire investigator sa Oslob Municipal Fire Station.

Walay natala nga nakalas o naangol sa maong sunog.

Ang kabomberohan nipahimangno sa publiko nga dili magsunog og mga basura og laya nga mga tanom o dahon aron malikayan ang posibleng pag-ulbo sa kayo.

Samtang dili mominos sa 15 ka panimalay ang naugdaw sa sunog sa may Luray 1, sa Dakbayan sa Toledo alas 12:20 kagahapon sa hapon adlaw nga Domingo.

Giisa sa Toledo City Fire Station ngadto sa 2nd alarm ang maong sunog tungod sa kahagip-ot sa dapit gumikan kay didto kini nagsugod sa interior nga bahin sa maong lugar.

Ang ubang niresponde nga bombero ug firetruck gikan pa usab niresponde ug grass fire sa barangay Canlumampao sa maong dakbayan.

Alas dos y media sa hapon gideklarar nga fire-out ang sunog ug padayon pa nga gisusi sa kabomberohan ang hinungdan sa pag-ulbo sa kayo.

Gibana-bana moabot ngadto sa P1.8milyones ang danyos sa maong sunog. (BANAT NEWS)