Nibunot og armas sa checkpoint

CEBU, Philippines — Nagtingkagol sa prisuhan ang 42-anyos nga lalake human kini mibunot sa iyang armas dihang gisita kini diha sa police checkpoint sa Pari-an Police Station 1 diha sa MJ cuenco Avenue, Barangay T. Padilla, siyudad sa Sugbo pasado alas 9 sa gabii, Abril 1,2024.

Giila ang dinakpan nga si Jose Edgar Encarnacion Bohol alyas Bagyo, habal-habal driver, residente sa Arellano Boulevard, Barangay San Roque ning siyudad.

Sa impormasyon sa Pari-an Police Station samtang nagpahigayon sila og checkpoint sa naasoy nga lugar ang suspek kinsa sakay sa iyang motorsiklo ug angkas ang kaipon niini misuway og balik sa agi human nakabantay sa checkpoint.

Apan nababagan kini sa kapulisan ug gipahunong ang suspek. Apan gikatahong nabantayan kini nga dunay giibot sa iyang hawak maong dalidali kining gipugngan.

Diha na kini nasakpan nga kalibre .45 nga pistola ang iyang giibot gikan sa hawak, nasuta nga kargado kini og unom ka bala ug wala siyay napakitang legal nga dokumento sa paghupot niini hinungdan nga siya gidakop.

Ang suspek nga nahinabi sa dySS Super Radyo Cebu mipasabot padulong siya mopalit og tambal sa iyahang manghod nga giingong dunay sakit nga leukemia.  Wala na niya mahipos matod ang iyahang armas sa pagdali-dali.

Apan dihang nakabantay siya sa checkpoint nilikay kini kay duna siya'y dala nga armas. Nakalitan ra siya sa dihang gisita sa kapulisan apan ang iyang pag-ibot sa armas iyaha ra unta kining i-surrender sa mga polis.

Napalit sa suspek ang iyahang armas sa barkada niini sa kantidad nga P13 mil para matud pa pang “self-defense” basin dunay mahitabo, apan giangkon sa suspek nga dili lisensyado ang iyahang armas.

Nitug-an sab kini nga nadakpan na siya sa Waterfront Police Station 3 niadtong 2022 tungod gihapon sa paghupot og dili lisensyadong armas.

Kasong kalapasan sa Republic Act 10591 ang ipasaka batok sa suspetsado.  IBM BANAT NEWS