Ratulon nga tulisan gipangita

CEBU, Philippines — Subsob ang pagpangita sa Cebu City Police Office (CCPO) sa giingong ratolon nga tulisan nga nakaangol og usa ka tutor dihang gitulis kini sa suspek sulod sa Public Utility Jeepney diha sa New Imus Road corner General Maxilom Avenue, Barangay Lorega San Miguel, siyudad sa Sugbo niadtong Semana Santa.

Kahinumduman, nalandig sa tambalanan sng biktima nga si Jemelita Balaba Salvador, 26, lumad nga taga Maasin City, Southern Leyte nga kasamtangan nga nagpuyo sa Talamban.

Naangol kini sa liog kay giingong naratol ang tulisan sa pagdumili sa biktima paghatag sa iyang gamit. Giingong kalit nibuto matud pa ang armas  ug nakaparatol og samot sa tulisan nga dali-daling nikanaog ug nisakay og laing pasaheroan pabalik sa downtown Cebu City.

Matud ni Police Lieutenant Colonel Janette Rafter, Deputy City Director for Operations sa CCPO wala sila mohunong pagpangita sa tulisan dungan sa panawagan sa publiko nga kun duna silay impormasyon maayong ihatag kini sa kapolisan.

Gihimug-atan hinuon ni Rafter nga luwas ang Cebu City apan dili gyud kalikayan sama sa ubang lugar nga dunay mga krimen apan gipasalig niini nga ilaha gyud kining sulbaron. (BANAT NEWS)