Napatay sa amahan

CEBU, Philippines — Naunay ug napatay sa 63-anyos nga amahan ang iyahang 28-anyos nga anak human iyaha kining napusilan atol sa ilang panagaway diha sa Sitio Lower Laguerta, Barangay Lahug, siyudad sa Sugbo, pasado alas-10 sa gabii sa adlaw’ng Lunes, Marso 25.

Ang biktima mao si Kenn Pondar Caballes samtang ang suspek ang iyang amahan nga si Eugenio Caballes.  Matud sa pamilya wala matuyo sa ilang amahan nga mapusilan biktima.

Nagkanayon ang ginang sa panimalay nga si Louisa nagsugod ang tanan sa dihang gitubag-tubag siya sa iyang anak dihang gisultihan bahin sa suga nga wala niini pawnga kay namahulay na unta silang tanan kay gabii na.

Sa wala pa sila mangatulog sayo anang gabhiuna una na kining gisugo nga pawngon ang suga, mitando kini apan wala diay motuman sa gisugo.

Dihang padung na matulog si Louisa gipukaw niya ang bana nga nakatulog samtang nagtan-aw og telebisyon aron magtarong higda apan nibangon kini aron motubag sa tawag sa kinaiyahan. Giingong nabantayan sa inahan nga nagsiga pa gihapon ang mga suga maong gisuna niya pagusab ang anak. Apan giingong nasuko kini ug nagtubag-tubag sa inahan.  Nakadungog ang amahan ug diha na nagsugod ang panaglalis sa duha hangtud nga nisangpot sa hinagitay og sumbagay.

Sa dihang migawas ang amahan nagbitbit na kini og armas, apan gikatahong gisugat kini og hapak sa anak gamit ang uno por dos nga kahoy nga matod pa dunay lansang ug naigo kini sa liog.

Natumba ang amahan ug matud pa nakablitan niya ang gatilyo sa armas ug nibuto kini. Sunod nga nahitabo, natumba ang anak ug nasuta nga naigo diay kini sa ulo.  Gikatahong hinulaman ra ang armas nga gigamit sa krimen.

Sigon ni Louisa nga daan ng galagot ang amahan sa iyahang anak gumikan matod pa sa kabadlungon niini.

Mitug-an sab ang pamilya nga kugihan kaayo mangita og kwarta ang biktima para makapalit lang og shabu. Giingon nga nagsugod kini og bisyo sa dihang nag-edad pa kini og 20-anyos.

“Badlungon gyud kaayo as in, pila ka tuig namong inantos, sus Ginoo ko intawon, gani amo ning gipabinisaya adto mi sa spiritual dad-on nako sinina ingon niya i-ampo siya sa sidlakan,” matid sa inahan nga si Louisa.

Ang pamilya dili mopasaka og kaso sa ilang padre de pamilya kay nagtuo silang aksidente gyud ang nahitabo ug naluoy sab sila sa amahan nga senior citizen nga masakiton na.

Usa sa mga anak ni Eugenio mipapriso na niini kaniadto sud sa duha ka semana kay gibato niini ang iyang pares.

 “Ug ako pabut-on dili ko gusto nga mapriso na akong amahan kay kahibawo gyud ko nga mao na akong amahan, unsay kuan sa akong papa, sweto gyud ko, kato nadisgrasya gyud ‘to, wala na kaantos,” sigon ni Junjun.  Padayon pa ang imbestigasyon sa kapulisan sa Mabolo Police Station pinangulohan ni Major Romeo Caacoy Jr. bahin sa maong hitabo.--   IBM BANAT NEWS