Tinigbasay tungod sa lighter, usa patay

CEBU, Philippines — Usa patay ug duha ang angol sa nahitabong tinigbasay sa Sitio Avocado, Barangay Talalak, Lungsod sa Sta. Catalina, Probinsiya sa Negros Oriental kagahapon sa alas 8 sa buntag.

Ang nakalas mao si Alfredo Tapil Jr., 42, samtang ang suspek mao si Gemar Rio Bulandres, 35, parehong mag-uuma ug residente ra sab sila sa naasoy nga lugar. Matud ni Police Major Gerry Leones, hepe sa Sta. Catalina Municipal Police Station nagbinuntagay og inom ang duha kauban ang lain nilang higala ug maoy tagiya sa balay nga diin sila nag-inom sugod Domingo sa gabii.

Matud pa human sila naginom nangape dayon ang duha kauban ang tagbalay nga si Carlito Oncino.

 Apan takulahaw lang kalit matud pa mibunot sa iyang gitak-in nga 24-pulgadas nga sundang si Tapil ug gitigbas si Bulandres sa liog.

Giingong naglayog ang duha bisan samaron na si Bulandres hangtud nga nailog niini ang sundang ug gibalos kini og tigbas kang Tapil nga naigo sab sa liog ug sa nagkadaiyang bahin sa lawas ug mga bukton ug kamot niini .

Human sa hitabo, boluntaryong mitahan sa kapulisan ang suspek ug na-recover sab ang sundang nga gigamit sa pagpanigbas. Kasong homicide ang ipasaka sa kapulisan batok kang Bulandres.

 “Amo man gyud ni file-an og kaso kay dia man tay patay, amo gyud ni sila kumbinsihon (pamilya) nga file-an og kaso ang suspetsado…Homicide ra ni siya kay naa may altercation, siya may nanguna (biktima),” sigon ni Leones.  Si Oncino nakaangkon sab og tinigbasan sa tuhod, nagtuo nga kadtong panaglalis sa duha bahin sa tag P10 nga lighter maoy sinugdanan niini.

“Kaning tag P10 nga lighter mao raman gud na…Kay pangutan-on ang usa kay wala, kato pung usa wala pud mao na nagkadako, nagkadako na hinoon,” sigon ni Oncino. (BANAT NEWS)