Mga simbahan gidagsa atol sa Bendita sa Lukay

MANILA, Philippines — Gidagsa sa daghang mga tawo ang nagkadaiyang simbahang Romano Katoliko sa Sugbu kagahapon sa pagtimaan sa Domingo sa Lukay o Palm Sunday nga gitawag sab og Passion Sunday.

Ang kadaghanan sa mga nanimba adunay gibitbit nga gipongpong na nga lukay nga ilang pabinditahan sa pari matag human sa misa.

Sa gawas sa mga simbahan, sama sa Cebu Metropolitan Cathedral ug Basilica Minore del Sto. Niño sa Cebu City daghang mga naninda og mga lukay.

Si Victoria Dayday, 47, taga Tayud, Consolacion nga usa sa mga naninda og mga lukay nga nahinabi niining tagsulat miingon nga iyang gikumpra sa Lungsod sa Compostela ang dala niyang mga lukay nga iyang gibaligya sa gawas sa simbahan.

Ang labing gamay nga lukay nga gilala nga krus mapalit og P10, adunay P20, P40 ngadto sa P50 ang pungpong niini, depende sa desinyo.

Si Carlito Piamono, 53  anyos  nga taga Barangay Labogon sa Siyudad sa Mandaue nga kuyog sa iyang sakop sa pamilya nga misimba sa Simbahan sa Our Lady of Fatima sa Barangay Basak usa usab sa mga namalit miingon nga gibinditahan sa pari ang lukay nga ilang dad-on  sa ilang balay.

Nagtuo sila sa ilang pamilya nga eng benditadong lukay nga ilang ibutang sa sa pultahan sa ilang balay magsilbi proteksyon nga dili makasulod ang mga dautang espirito. — /IBM (BANAT NEWS)