PRO-7 preparado na sa seguridad sa mga bakasyonista

CEBU, Philippines — Karong nagkaduol na ang tingbakasyon subsob na sab ang pagpangandam sa Police Regional Office (PRO)-7 pinaagi sa pakig-alayon sa ahensya sa security sector ug gihan-at na ang security coverage ug ilusad usab ang LIGTAS SUMVAC 2024 campaign sa Abril 1 ngadto na sa May 31, 2024 aron masiguro ang luwas ug malinawon nga summer vacation.

Panahon sa tingbakasyon, daghang mga tawo gikan sa siyudad ang mamauli sa ilang mga probinsiya aron magbakasyon ug mobisita og mga tourist sites.

Dili kalikayan nga ang mga kriminal mopahimulos gyud sa higayon aron mahimo ang ilang dautang plano maong hugot ang pagbantay sa kapulisan sa seguridad.

“Our top priority is to prevent crime incidents in the communities and we are intensifying the deployment of our PNP personnel to provide maximum security coverage and public safety assistance in key places of convergence such as transport terminals and tourist sites,” sigon ni PRO-7 Regional Director Brigadier General Anthony Aberin.

Gihimug-atan sab sa opisyal nga wala’y na-monitor nga hulga sa Central Visayas diin nagpasabot kini nga ang summer vacation gilauman nga  malinawon ug hapsay.

Kini base sa latest assessment sa Regional Intelligence Committee apan giklaro sa PRO-7 nga dili sila mokompiyansa ug magpadayon gihapon ang ilahang implementasyon sa naandan nga police operations.

“We are ready to secure the region with all security plans in place and ready for implementation,”  pasalig pa ni Aberin.--  IBM BANAT NEWS