Gidaghanon sa balay nga nasunog sa Talisay Misaka

CEBU, Philippines — Nisaka ngadto sa 103 ka balay ang natala nga naugdaw sa sunog didto sa sitio Atisan, Barangay Cansojong, Dakbayan sa Talisay.

Si Talisay City mayor Gerald Anthony  Samsam  Gullas nipadala sa mga department heads sa lugar aron moasistar sa mga apektado nga residente nga miabot ngadto sa 491 ka indibiwal. Duha ka evacuation center ang gihimo gumikan sa kadaghan sa mga nasunogan. Adunay 70 ka pamilya nga gipahimutang sa basketball gym sa Cansojong ug ang sobra didto sa Borromeo Brother Elementary School.

Si konsehal Roy Romares sa Cansojong maoy usa sa mga nasunogan nga nahimong emosyunal sa paghinumdom sa nahitabo ug nakita ang pagkaugdaw sa ilang panimay ug tindahan. Si kapitan Vic Oberes nihulagway nga posible nga mosaka pa ang ihap sa nabiktima sa sunog tungod kay ang uban nilahos na og puyo sa ilang mga paryenti ug wala nila matala.

Sa pasiuna nga nadawat sa mga nasunogan si Oberes nitataw nga dili na kinahanglan nga modeklarar sila og state of calamity. Ang mayor nagkanayon nga mobalik sila sa evacuation center sa adlaw nga Biyernes aron ihatag ang pinansyal nga ayuda ingon man ang hinabang sab gikan sa buhatan ni kongresista Rhea Gullas.

Sa laing bahin gitinguha karon ni Lapu-Lapu City Mayor Junard "Ahong" Chan ang pagpabarog og multi-story socialized housing sa sitio Sta. Maria sa Barangay Pusok, Siyudad sa Lapu-Lapu nga maoy mahimong permanenteng kapuy-an sa mga nasunogan.

suma pa niya nga ang maong lima ka edepisyo nga socialized house project anha tukoron sa 5,000 metro kuwadrado nga luna sa sitio Sta. Maria nga idonar ngadto sa siyudad. Una niini ang kagamhanan sa dakbayan sa Lapu-Lapu nakigtagbo sa mga pribadong tag-iya sa luna sa sitio Santa Maria.

Si Mayor Chan malaumon nga mahingpit na ang pagdonar sa 5,000 square meters nga luna ngadto sa kagamhanan sa siyudad aron masugdan gilayon ang pagpatukod sa proyekto.

Matud pa niya gikinahanglan nga himoon ang mga legal nga pamaagi nga naglakip sa pag-amendar sa ordinansa sa paglibkas sa moratorium sa socialized housing project's construction.

Hinuon iyang paningkamutan nga ang kaugmaran sa gitinguhang socialized housing mahitabo karong tuiga. (BANAT NEWS)