30 ka babayeng polis sa LCPO gipaubos sa training

CEBU, Philippines — Gipaubos  sa seminar  ang 30  ka babayeng polis nga nadestino sa lain-laing buhatan sa Lapu-Lapu City Police Office.

Kini gihimo ni Police Colonel Elmer Lim, director sa LCPO sa tinguha niini nga kadugangan pa ang mga kasayuran sa mga babayeng polis alang sa gipatuman nga mga lagda sa mga kaso nga naglambigit sa kababayen-an ug kabataan.

Ang maong seminar nga gipahigayon sa LCPO training room maoy kabahin usab sa mga kalihokan nga gipasiugdahan sa kapolisan sa National Women’s Month celebration.

Si Police Lieutenant Colonel Fortunato Ecle, LCPO deputy director for administration maoy nangulo sa maong kalihokan nga gitambongan usab ni Police Lieutenant Rachel Dumageng, deputy chief City Community Affairs Development Unit uban usab  nila ni Atty. Irene Ann Cballes  isip lecturer.

Sa iyang mensahe, si Lim nidasig sa tanang nisalmot  sa maong seminar sa pagpataas pa sa imahen sa kapolisan pinaagi sa tukma ug epektibo niining pagtuman sa ilang kaakohan. (BANAT NEWS)