Luna nga gipanag-iya sa Probinsiya sa Sugbo ipagamit sa CNU

CEBU, Philippines — Ipagamit sa Probinsiya sa Sugbo ang bahin sa luna nga gipanag-iya niini sa Barangay Busay, Dakbayan sa Sugbo ngadto sa Cebu Normal University (CNU).

Ang hunta probinsiyal nihatag na og pagtugot kang Gobernador Gwendolyn Garcia nga mogama og kasabotan tali sa CNU alang sa pagpagamit sa 10,000 metro kwadrado nga luna nga gipanag-iya sa Kapitolyo diha sa nahisgutang barangay.

Niadtong Oktubre 10, 2023 ang university president sa CNU nga si Daniel Ariaso, Sr. nipadala og sulat sa gobernador ug sa Sangguniang Panlalawigan aron paghangyo og donasyon sa luna nga niabot ngadto sa lima ka ektarya alang sa expansion o pagpalapad sa maong tunghaan.

Apan imbes nga idonar lahi ang gihimo sa Kapitolyo.

"Instead of donating a portion of its property, the province proposed instead to allow CNU to use a portion of its property through usufruct agreement", tipik sa resolusyon ni Bokal John Ismael Borgonio.

Ang tigdumala sa CNU niuyon usab sa maong arrangement tali sa Probinsiya sa Sugbo.

Ang usufruct agreement mao ang pamaagi diin ang tag-iya sa usa ka property mopagamit sa luna niini ngadto sa usa ka indibidwal o institusyon sulod sa pipila ka tuig ug ipaubos kini og pormal nga kasabot.

Ug kon adunay paglapas ang beneficiary sa kasabotan mamahimong bakwion sa tag-iya ang maong luna nga gipagamit. BDB BANAT NEWS