Nagduma sa ticketing system sa CSBT niklaro bahin sa ticket

CEBU, Philippines — Mihimo og katin-awan ang kompaniya nga nagdumala sa ticketing system sa Cebu South Bus Terminal (CSBT) nga ang P10 nga charge sa pag-ilis og ticket malibkas kon walay bakante nga bus.

Ang Topline Hi-Tech and Synergy Corporation mipasabot niini human dunay mireklamo nga pasahero nga gipabayad sa giilis nga ticket.

Ang pasahero nga nagpost sa facebook sa ngalan nga Nats Rojo niadtong Marso 2 nagkanayon nga pasado alas 9 sa gabii niadtong Marso 1 mipili sila sa CSBT aron mobyahe sa habagatan, apan tungod sa kadaghang tawo ug kataas sa linya sa pasahero naabtan sila sa alas 12:30 na sa kaadlawon niadtong Marso 2, 2024.

Gipabalik sila og linya sa ticketing booth aron bayluan ang ilang ticket tungod kay lahi na nga adlaw ug petsa apan gipaninglan sila og P10 nga charge sa giusab nga ticket.

"pag abot sa ticketing bayad daw 10 kay change ticket kay mao man daw pamaagi, ok raman unta kon amoa sala nga mag change mig ticket., pro maayo kaha ni nga pabayron mi sa ana nga kantidad nga dili man namo sala nga wala na diay bus?? " sumala sa maong pasahero.

Si Bridgette Mueller ang Senior Vice President sa Topline nagkanayon nga niadtong higayona, adunay siyam (9) ka pasahero ang nahabilin sa dihang napuno na ang bus nga ang rota padulong sa Oslob.

Si Mueller nagkanayon nga kinahanglan mag-ilis og ticket isip kabahin sa seguridad nga ilang gipatuman.  Apan gitataw niini nga dili angay paninglan ang pasahero og P10 nga charge pagpuli og ticket kun ang rason walay available nga bus.

Sumala sa Topline niadtong higayona adunay mga Job Trainees nga nitabang sa mga ticketing agents ug wala makasunod sa maong polisiya ug dunay nahitabo nga "miscommunication".

Nihimo na og aksyon ang kompaniya kabahin niini pinaagi sa pagpaubos sa disciplinary actions sa mga nalambigit nga OJT.

Mi-offer usab og refund sa ticket charge ang Topline sa mga pasahero nga apektado. (BANAT NEWS)