Commission on Population magtukod og bag-ong building

CEBU, Philippines — Gipaabot nga itukod karong tuiga ang bag-ong edipisyo sa Commission on Population and Development (CPD) kanhi Population Commission (PopCom) sa bag-ong lokasyon niini.

Sa taho sa Capitol Information Office, ang bag-ong building sa CPD itukod sa dalan M. Velez sa dakbayan sa Sugbo kon diin ang groundbreaking niini gikatakda sa bulan sa Abril karong tuiga.

Si Usec Lisa Grace Bersales uban sa CPD 7 director nga si Atty. Bruce Ragas mibisita ngadto sa Kapitolyo ug nagpasalamat kang gobernador Gwendolyn Garcia kabahin sa pagpagamit sa maong luna.

Ang CPD nga usa ka attached agency sa National Economic and Development Authority, kasamtangang nahimutang sa 501 metro kwadrado nga luna nga iya sa Probinsya sa Sugbo sa dalan M. Cuenco Ave. sa Banilad dakbayan sa Sugbo.

Usa kini sa mga buhatan sa national government nga niuyon sa tanyag sa Kapitolyo nga ibalhin ang opisina sa DA compound kon diin ang maong ahensya gigahinan og 1,008 metro kwadrado nga luna nga katukoran sa ilang building.

“We have a bigger lot, and it says it’s ready for us to already use. We were there this morning, and I’m very happy to say that we have a very good place for our new home,” pagkutlo kang USec Bersales sa Sugbo News ang news portal sa Probinsya sa Sugbo.

“It is very beautiful; we have already finished the road network there, all concreted, and you’d be in much better shape there than needing to fight with the traffic in Banilad,” matud ni Garcia ngadto kang Usec. Bersales.

Ang Kapitolyo mi-offer sa mga ahensya nga anaa nag-okupar sa luna niini sa Banilad nga mobalhin subay sa tinguha sa Probinsya nga i-develop ang maong area aron makadugang kini sa panudlanan sa Probinsya sa Sugbo. (BANAT NEWS)