Drayber sa motorsiklo nga gisakyan sa namusil sikop sa buy-bust

CEBU, Philippines — Nasikop sa kapolisan sa Inayawan Police Station sa Cebu City Police Office ang drayber sa motorsiklo nga gisakyan sa gunman nga nipusil sa usa ka 20-anyos nga babaye nga miyembro sa LGBT community diha sa Sitio Upper Tabucanal, Barangay Poblacion Pardo, Siyudad sa Sugbo kagahapon sa kadlawon. 

Si alyas “Cielo”, 23-anyos, residente sa Sitio Upper Tabucanal, Siyuad sa Sugbo nadakpan atol sa buy-bust operation sa kapolisan.

Si Police Major Jiceree Basitao, hepe sa Inayawan Police Station nagkanayon nga nakadawat sila og impormasyon nga adunay illegal drug transaction diha sa Sitio Upper Tabucanal hinungdan nga nipahigayon sila og buy-bust operation batok sa suspetsado.

Nasakmit sa mga polis gikan kang Cielo ang 10,2 gramong shabu nga nibalor ngadto sa P70,000.

Nasayran sa kapolisan nga si Cielo ang drayber sa motorsiklo nga gisakyan sa suspetsado sa pagpamusil gumikan sa footage sa closed circuit television nga nikatap ug nag-vira sa social media.

Ang inahan ni Cielo ang nihimakak sa pasangil batok sa iyang anak.

Apan giangkon sa inahan niini nga mogamit og ilegal nga drugas ang iyahang anak.

Sa laing bahin, duha ka suspetsadong pusher og shabu nga naglakip sa senior citizen ug menor de edad nga babaye ang nadakpan sa buy-bust operation sa kapolisan sa Presinto 1 sa Mandaue City Police Office (MCPO) sa niaging gabii diha sa Barangay Mantuyong, Siyudad sa Mandaue.

Si Police Staff Sergeant Jigger Soquino maoy nangulo sa nahisgutang buy-bust operation.  Ang mga suspetsado nagpangedaron kini og 66 ug 16-anyos.

Nasakmit gikan sa mga suspetsado ang upat ka gramo nga shabu ug P500 nga buy- bust money.  — BDB BANAT NEWS